ரஜினி பட இசை அமைப்பாளர் விஜய் ஆனந்த் காலமானார்
1980களில் அறிமுகமான முக்கியமான இசை அமைப்பாளர்களில் ஒருவர் விஜய் ஆனந்த். நாணயம் இல்லாத நாணயம், ஊருக்கு உபதேசம், ராசாத்தி வரும் நாள் உள்ளிட்ட பல படங்களுக்கு இசை அமைத்தார். ரஜினி நடிப்பில் 1986ல் வெளியான 'நான் அடிமை இல்லை' படத்தில் இடம்பெற்ற 'ஒரு ஜீவன் தான், உன் பாடல் தான்..' என்ற மனதை உருக்கும் பாடல் இவர் இசை அமைப்பில் உருவானது. தமிழில் வாய்ப்புகள் குறையவே கன்னட படங்களுக்கு இசை அமைத்தார். கன்னடத்தில் 100க்கும் மேற்பட்ட படங்களுக்கு இசையமைத்து பிரபலமானார்.
கடந்த சில வருடங்களாகவே உடல்நலக் குறைவால் அவதிப்பட்டு வந்த விஜய் ஆனந்த் நேற்று சென்னையில் காலமானார். அவருக்கு வயது 71. அவரது மறைவுக்கு திரையுலக பிரபலங்கள் இரங்கல் தெரிவித்துள்ளனர். அவரது இறுதிச்சடங்கு பெருங்களத்தூரில் நடந்தது.