சாலை விபத்தில் பாதிக்கப்பட்டோருக்கு முதல் 7 நாட்களுக்கு இலவச மருத்துவ சிகிச்சை வழங்குவதற்கான திட்டத்தை அரசு செயல்படுத்துவதற்கான பணிகளை மேற்கொண்டு வருவதாக இந்திய ஆட்டோமொபைல் உற்பத்தியாளர்கள் சங்கத்தின் (SIAM) 65வது ஆண்டு மாநாட்டில் உரையாற்றிய மத்திய சாலைப் போக்குவரத்து மற்றும் நெடுஞ்சாலைகள் அமைச்சர் திரு. நிதின் கட்கரி தெரிவித்துள்ளார்.
அதிகாரப்பூர்வ தரவுகளின்படி, நாட்டில் ஆண்டுதோறும் 4.6 லட்சத்திற்கும் அதிகமான சாலை விபத்துகள் பதிவாகின்றன, இதன் விளைவாக கிட்டத்தட்ட 1.6 லட்சம் இறப்புகளும், 4 லட்சத்திற்கும் அதிகமானவர்களுக்கு காயங்களும் ஏற்படுகின்றன.
சாலை விபத்துகளால் ஒவ்வொரு மணி நேரத்திற்கும் சராசரியாக 18 உயிர்கள் இழக்கப்படுகின்றன. இரு சக்கர வாகனங்களே அதிக உயிரிழப்புகளுக்குக் காரணமாகின்றன, அதைத் தொடர்ந்து பாதசாரிகள் மற்றும் சைக்கிள் ஓட்டுநர்கள் உள்ளனர்.
2023 ஆம் ஆண்டில் மட்டும் தமிழ்நாட்டில் மொத்தமாக 67 ஆயிரத்து 213 சாலை விபத்துகள் பதிவாகியுள்ளது. அதே வேளையில் விபத்தில் 18,347 பேர் உயிரிழந்துள்ளனர்.
இன்றைக்கு நடைபெற்ற இந்திய ஆட்டோமொபைல் உற்பத்தியாளர்கள் சங்கத்தின் (SIAM) 65வது ஆண்டு மாநாட்டில் பேசிய அமைச்சர் நிதின் கட்கரி,
தற்போது, சாலை விபத்தில் பாதிக்கப்பட்டவர்கள் மோட்டார் வாகனச் சட்டத்தின் கீழ் இழப்பீடு பெறத் தகுதியுடையவர்கள் மற்றும் சொலாசியம் நிதி போன்ற திட்டங்கள் மூலம் வரையறுக்கப்பட்ட ஆதரவைப் பெற முடியும். சமீபத்திய ஆண்டுகளில், இந்திய தேசிய நெடுஞ்சாலை ஆணையத்தின் (NHAI) ஆதரவுடன் தேசிய நெடுஞ்சாலைகளில் பணமில்லா சிகிச்சைக்கான முன்னோடித் திட்டங்களையும் அரசாங்கம் அறிமுகப்படுத்தியுள்ளது. இருப்பினும், நாட்டின் பெரும்பகுதிகளில் உடனடி மற்றும் விரிவான மருத்துவ பராமரிப்புக்கான சீரான, நாடு தழுவிய அமைப்பு தொடர்ந்து இல்லை.
தமிழ்நாட்டில் தற்பொழுது முதலமைச்சர் திரு. மு.க ஸ்டாலின் அவர்களின் இன்னுயிர் காப்போம்-நம்மை காக்கும் 48 மணி நேரம் திட்டத்தின் மூலம் முதல் 48 மணி நேரத்துக்குள் விபத்தில் பாதிக்கப்பட்டோருக்கு அவசர மருத்துவ சிகிச்சை செலவைத் தமிழ்நாடு அரசே
மேற்கொள்ளும் வகையில், திட்டம் செயல்பாட்டில் உள்ளது.