பாட்னா: பிஹார் சட்டப்பேரவை தேர்தலுக்காக ஆர்ஜேடி – காங்கிரஸ் இடையே தொகுதிப் பங்கீடு பேச்சுவார்த்தை நடந்து வரும் நிலையில், பாரம்பரியமாக காங்கிரஸ் கட்சி போட்டியிடும் 25 தொகுதிகளுக்கான வேட்பாளர்களை காங்கிரஸ் கட்சியின் மத்திய தேர்தல் குழு (CEC) தேர்வு செய்துள்ளது.
பிஹார் சட்டப்பேரவைக்கு நவம்பர் 6, 11 ஆகிய தேதிகளில் இரு கட்டங்களாக தேர்தல் நடைபெற உள்ளது. நவம்பர் 14-ல் வாக்குகள் எண்ணப்பட்டு முடிவு அறிவிக்கப்பட உள்ளது. இந்த நிலையில், பிஹாரில் எதிர்க்கட்சிகளின் கூட்டணியான மகாகத்பந்தனுக்கு தலைமை வகிக்கும் ராஷ்டிரிய ஜனதா தளத்துடன் காங்கிரஸ் கட்சி தொகுதிப் பங்கீட்டுப் பேச்சுவார்த்தை நடத்தி வருகிறது. பிஹாரில் மொத்தமுள்ள 243 சட்டப்பேரவை தொகுதிகளில் 55 முதல் 60 இடங்களில் காங்கிரஸ் போட்டியிடும் என்று எதிர்பார்க்கப்படுகிறது.
இந்த சூழலில், காங்கிரஸ் நாடாளுமன்றக் கட்சித் தலைவர் சோனியா காந்தி, கட்சித் தலைவர் மல்லிகார்ஜுன் கார்கே மற்றும் மக்களவை எதிர்க்கட்சித் தலைவர் ராகுல் காந்தி உள்ளிட்ட உயர்மட்டத் தலைவர்கள் அக்கட்சியின் மத்திய தேர்தல் குழு கூட்டத்தில் நேற்று ஆலோசனை நடத்தினர். இதில் பிஹாருக்கான 25 வேட்பாளர்கள் தேர்வு செய்யப்பட்டதாக தகவல் வெளியாகியுள்ளது.
இதுகுறித்து பேசிய பிஹார் காங்கிரஸ் தலைவர் ராஜேஷ் ராம், “மூத்த கட்சி நிர்வாகிகள் மாநிலத் தலைவர்களின் கருத்துக்களை பொறுமையாகக் கேட்டனர், மேலும் கூட்டத்தின் போது விவாதிக்கப்பட்ட தொகுதிகள் ஏற்கனவே கூட்டணிக் கட்சிகளால் எங்களுக்கு ஒதுக்கப்பட்டவை மற்றும் காங்கிரஸின் கோட்டைகளாக இருந்தவை. இந்த ஆலோசனைக் கூட்டத்தில், பாரம்பரியமாக காங்கிரஸ் போட்டியிடும் இடங்களை நாமே பெறவேண்டும் என்று நாங்கள் கூறினோம்.
அதற்கான வேட்பாளர்களும் ஆலோசனைக்குப் பிறகு முடிவு செய்யப்பட்டுள்ளனர். ஆனால் எங்கள் கூட்டணிக் கட்சிகளுடனும் எங்கள் மாநிலத் தலைவர்களுடனும் கலந்துரையாடிய பின்னரே வேட்பாளர்களின் பெயர்களை அறிவிப்போம். மகாகத்பந்தன் கூட்டணி கட்சிகளிடையே தொகுதி பங்கீட்டில் எந்தப் போட்டியும் இல்லை. எங்கள் அனைத்து கூட்டணி கட்சிகளிடமும் ஆலோசித்த பிறகு, நாங்கள் கூட்டாக வேட்பாளர்களை முடிவு செய்து பத்திரிகையாளர் சந்திப்பில் அறிவிப்போம்” என்று அவர் கூறினார்.