பொங்கல் வெளியீடாக விஜய்யின் ‘ஜனநாயகன்’, சிவகார்த்திகேயனின் ‘பராசக்தி’ என இரண்டு திரைப்படங்கள் மட்டுமே திரைக்கு அறிவிக்கப்பட்டிருந்தன.
ஆனால், அ.வினோத் இயக்கத்தில் உருவாகியிருக்கும் ‘ஜனநாயகன்’ திரைப்படத்திற்கு தணிக்கை சான்றிதழ் கிடைக்காததனால் படத்தின் ரிலீஸ் தள்ளிப்போயிருக்கிறது. ‘பராசக்தி’ திரைப்படம் மட்டுமே திட்டமிட்டபடி கடந்த 10-ம் தேதி வெளியானது.
அதைத் தாண்டி பொங்கல் ரிலீஸுக்காக பல தெலுங்கு திரைப்படங்கள் திட்டமிடப்பட்டிருந்தன.
பிரபாஸின் ‘தி ராஜா சாப்’ திரைப்படம் கடந்த 9-ம் தேதி வெளியானது. அதைத் தொடர்ந்து சிரஞ்சீவியின் ‘மன ஶங்கர வர பிரசாத் காரு’ திரைப்படம் இன்று வெளியாகியிருக்கிறது.
அதைத் தொடர்ந்து ரவி தேஜாவின் ‘பர்தா மஹாசாயுலகி விக்ஞாப்தி’ என்ற திரைப்படம் 13-ம் தேதியும், நவீன் பொலிஷெட்டியின் ‘அனகனக ஒக்க ராஜு’ திரைப்படம் 14-ம் தேதியும் வெளியாகிறது.
இந்நிலையில் அடுத்தடுத்து மூன்று தமிழ் திரைப்படங்கள் பொங்கல் வெளியீடாக திரைக்கு வருகின்றன என அறிவித்திருக்கிறார்கள்.
இயக்குநர் நலன் குமாரசாமி இயக்கத்தில், கார்த்தி நடிப்பில் உருவாகியிருக்கும் ‘வா வாத்தியார்’ திரைப்படம் கடந்த டிசம்பர் 5-ம் தேதி திரைக்கு வருவதாக இருந்தது. ஆனால், அப்போது அப்படத்தின் ரிலீஸ் தடைபட்டது.
பிரச்னைகள் அனைத்தும் முடிக்கப்பட்டு ‘வா வாத்தியார்’ படம் வருகிற 14-ம் தேதி வெளியாவதாக அறிவித்திருக்கிறார்கள்.
அதைத் தொடர்ந்து மலையாளத்தில் வெளிவந்த ‘ஃபலிமி’ படத்தின் இயக்குநர் நித்திஷ் சஹாதேவ் இயக்கத்தில், ஜீவா நடிப்பில் உருவாகியிருக்கும் ‘தலைவர் தம்பி தலைமையில்’ திரைப்படம் 15-ம் தேதி ரிலீஸ் ஆகிறது.
மேலும், ‘திரௌபதி 2’ திரைப்படமும் அதே 15-ம் தேதி திரைக்கு வருவதாக அறிவித்திருக்கிறார்கள்.