Jammu-Kashmir special status case is a heated debate on the first day | ஜம்மு – காஷ்மீர் சிறப்பு அந்தஸ்து வழக்கு முதல் நாளிலேயே காரசார விவாதம்

புதுடில்லி, ஜம்மு – காஷ்மீருக்கான சிறப்பு அந்தஸ்து நீக்கப்பட்டதை எதிர்த்து தொடரப்பட்ட வழக்கின் விசாரணை, உச்ச நீதிமன்றத்தில் நேற்று துவங்கியது. முதல் நாளிலேயே, காரசாரமான விவாதம் நடந்தது.

ஜம்மு – காஷ்மீர் மாநிலத்துக்கு சிறப்பு அந்தஸ்து அளிக்கும் வகையில், அரசியல் சாசனத்தின், 370வது பிரிவு நடைமுறையில் இருந்தது.

இதன்படி, காஷ்மீருக்கென தனி அரசியல் சாசனம், கொடி, தன்னாட்சி அதிகாரம் போன்ற சலுகைகள், அதிகாரங்கள் வழங்கப்பட்டிருந்தன.

கடந்த 2019, ஆக., 5ல், ஜம்மு – காஷ்மீருக்கு சிறப்பு அதிகாரம் அளிக்கும் இந்த சட்டப் பிரிவை நீக்கும் மசோதா பார்லிமென்டில் நிறைவேற்றப்பட்டது.

இதைத் தொடர்ந்து, ஜம்மு – காஷ்மீர், லடாக் என, இரண்டு யூனியன் பிரதேசங்களாக பிரிக்கப்பட்டன.

இதில், ஜம்மு – காஷ்மீர், சட்டசபையுடன் கூடியதாக இருக்கும் என்று அறிவிக்கப்பட்டது.

ஜம்மு – காஷ்மீருக்கான சிறப்பு அதிகாரத்தை நீக்கும் நடவடிக்கைகளை எதிர்த்து, உச்ச நீதிமன்றத்ததில், 20க்கும் மேற்பட்ட வழக்குகள் தாக்கல் செய்யப்பட்டுள்ளன.

இந்த வழக்குகளை, திங்கள், வெள்ளிக்கிழமைகளைத் தவிர்த்து, தினசரி அடிப்படையில், ஐந்து நீதிபதிகள் அமர்வு விசாரணை நடத்தும் என, உச்ச நீதிமன்றம் அறிவித்திருந்தது.

இதன்படி, தலைமை நீதிபதி டி.ஒய்.சந்திரசூட், நீதிபதிகள், சஞ்சய் கிஷண் கவுல், சஞ்சீவ் கன்னா, பி.ஆர். கவாய், சூர்ய காந்த் ஆகியோர் அடங்கிய அரசியல் சாசன அமர்வில், இந்த வழக்கில் நேற்று விசாரணை துவங்கியது. மனுதாரர்கள் தரப்பில், மூத்த வழக்கறிஞர் கபில் சிபல், தன் வாதத்தை நேற்று துவக்கினார்.

வழக்கு தொடர்பாக அவர் விரிவாகவும், மற்ற வழக்கறிஞர்கள் சுருக்கமாகவும் வாதங்களை முன்வைக்கும்படி அமர்வு கூறியிருந்தது.

சிறப்பு அதிகாரம் நீக்கப்பட்டு, நான்கு ஆண்டுகள் நிறைவடைய உள்ள நிலையில், இந்த வழக்கு விசாரணைக்கு வந்துள்ளது.

முதல் நாளிலேயே, நீதிபதிகள் மற்றும் மூத்த வழக்கறிஞர் கபில் சிபல் இடையே காரசாரமான விவாதம் நடந்தது.

கபில் சிபல் தன் வாதத்தை இன்றும் தொடர்கிறார்.