இந்திய ஜனநாயக கட்சியின் தலைவர் பச்சமுத்து. இவரது தலைமையின் கீழ் இயங்கும் ஐஜேகே, கடந்த 2019ம் ஆண்டு நாடாளுமன்றத்தேர்தலில் திமுகவுடன் கூட்டணி அமைத்து போட்டியிட்டது.
இந்த தேர்தலில் ஐஜேகே கட்சிக்கு பெரம்பலூர் மக்களவை தொகுதி ஒதுக்கப்பட்ட நிலையில் உதயசூரியன் சின்னத்தில் போட்டியிட்டு, பச்சமுத்து அமோக வெற்றி பெற்றார். இதன் பிறகு பச்சமுத்து பெரம்பலூர் தொகுதி பக்கமே தலைகாட்டவில்லை என்கிற குற்றச்சாட்டு தொகுதி மக்கள் மத்தியில் எழுந்தது.
இதனை ஈடு செய்யும் வகையில், இந்த ஆண்டும் தொகுதியை சேர்ந்த 300 மாணவர்களுக்கு எஸ்ஆர்எம் பல்கலைக்கழகத்தில் இலவசக் கல்வி வழங்குவதாக கூறி தன்னுடைய இருப்பை பச்சமுத்து தக்கவைத்துக்கொண்டார்.
கூட்டணியிலிருந்து பச்சமுத்து வெளியேறிவிட்டாலும் மக்களவை உள்பட முக்கியமான இடங்களில் எல்லாம் இன்னமும் திமுக எம்.பியாகவே தன்னை அடையாளப்படுத்தி வருவதாக கூறப்படுகிறது. இதற்கிடையே சமீபகாலமாக நிருபர்களை சந்திக்கும் பச்சமுத்து மத்திய பாஜ அரசுக்கு ஆதரவாகவும், தமிழக அரசுக்கு எதிராகவும் கருத்துகளை கூறி வருகிறார்.
தமிழ்நாடு வளர்ந்த மாநிலம் என சொல்வது உண்மை இல்லை. நீட் தேர்வு எதிர்ப்பு, புதிய கல்விக்கொள்கை எதிர்ப்புக்கு அரசியலே காரணம். தமிழக கல்வி துறை செயல்பாடுகள் சரியில்லை.
பள்ளிகளில் வகுப்பறை இல்லாமல் மாணவர்கள் மரத்தடியில் படிக்கும் நிலை உள்ளது. அரசு கல்லூரிகளில் அடிப்படை கட்டமைப்புகள் இல்லை, என்பன போன்ற குற்றச்சாட்டுகளை செல்லும் இடங்களில் எல்லாம் தெளித்து திமுகவுக்கு எதிரான நிலைப்பாட்டை உறுதி செய்து வருகிறார்.
இந்த நிலையில் பச்சமுத்துவின் இந்த அதிரடி நடவடிக்கைகளுக்குப் பின்னால் பாஜக இருப்பது தற்போது வெளிச்சத்துக்கு வந்துள்ளதால், தமிழக அரசியலில் பெரும் பரபரப்பான சூழல் நிலவி வருகிறது.
மாணவர்களின் நலனை கருதியே பள்ளி கல்வி துறை பின் வாங்குகிறது – அமைச்சர் பேட்டி
அதாவது வருகின்ற 2024 மக்களவைத் தேர்தலை முன்னிட்டு, தமிழக பாஜகவின் பலத்தை அதிகரிக்க செய்யும் வகையில், பச்சமுத்து எம்.பியிடம் டெல்லி தலைமை பேச்சுவார்த்தை நடத்தியதாக கூறப்படுகிறது.
அப்போது, ‘இனி உங்களால் திமுகவுடன் பழையபடி நெருங்க முடியாது. திமுகவை எதிர்த்து அரசியல் செய்ய முடியாது. பேசாமல் ஐ.ஜே.கே கட்சியை பாஜகவில் இணைச்சுடுங்க’ என்று கோரிக்கை விடுத்துள்ளனர்.
அதற்கு பச்சமுத்து‘கவுரவமான பதவி கொடுத்தால் இணைக்க தயார்’ என்று பச்சைக்கொடி காட்டியதாகவும், இதற்கான ஏற்பாடுகள் அதிவிரைவில் நடக்கலாம் என்றும் கூறப்படுகிறது.
தற்போது பச்சமுத்து திமுக எம்.பியாக இருக்கும் நிலையில் பா.ஜ.கவில் இணையப் போவதாக கூறப்படும் தகவல் தமிழக அரசியலில் விரைவில் அனல் கிளப்பும் என எதிர்பார்க்கப்படுகிறது.