புதுடில்லி :தமிழகத்தில் மின் கட்டணத்தை உயர்த்திய தமிழக மின்சார ஒழுங்குமுறை ஆணையத்தின் உத்தரவுக்கு எதிராக தாக்கல் செய்யப்பட்ட மேல்முறையீட்டு மனுவை உச்ச நீதிமன்றம் நேற்று தள்ளுபடி செய்தது. ஆணையத்திற்கான சட்ட அதிகாரியை மூன்று மாதங்களுக்குள் நியமிக்கும்படி தமிழக அரசுக்கு உத்தரவிட்டது.
தமிழகத்தில் மின் கட்டண உயர்வு தொடர்பாக இறுதி முடிவு எடுக்க தமிழக மின்சார ஒழுங்குமுறை ஆணையத்திற்கு தடை விதிக்க கோரி, தமிழக நுாற்பாலை சங்கங்கள் சார்பில் சென்னை உயர் நீதிமன்ற மதுரை கிளையில் மனு தாக்கல் செய்யப்பட்டது.
இந்த மனுவை விசாரித்த உயர் நீதிமன்றத்தின் மதுரை கிளை, ‘தமிழக மின்சார ஒழுங்குமுறை ஆணையத்தில் சட்ட அதிகாரியை சேர்த்த பின் தான், மின் கட்டண உயர்வு குறித்து முடிவெடுக்க வேண்டும்.
அதுவரை மின் கட்டண உயர்வை அமல்படுத்த தடை விதிக்கப்படுகிறது’ என, உத்தரவிட்டது.
இந்த உத்தரவை எதிர்த்து சென்னை உயர் நீதிமன்றத்தில் மேல்முறையீடு செய்யப்பட்டது. மனுவை விசாரித்த இரு நீதிபதிகள் அடங்கிய அமர்வு, மின் கட்டணத்தை உயர்த்தவும், இது குறித்து முடிவெடுக்கவும் விதிக்கப்பட்டிருந்த தடையை நீக்கி உத்தரவிட்டது.
இந்த உத்தரவை எதிர்த்து தமிழக நூற்பாலைகள் சங்கம் சார்பில் உச்ச நீதிமன்றத்தில் மேல்முறைடு செய்யப்பட்டது.
இந்த மனு, உச்ச நீதிமன்ற நீதிபதி எஸ்.கே.கவுல் தலைமையிலான அமர்வு முன் நேற்று விசாரணைக்கு வந்தது.
அப்போது, ‘ஆணையங்களுக்கு சட்ட அதிகாரிகளை நியமனம் செய்ய உச்ச நீதிமன்றம் ஏற்கனவே உத்தரவிட்டுள்ளதே, அதை அமல்படுத்தவில்லையா’ என, தமிழகஅரசிடம் நீதிபதிகள் கேள்வி எழுப்பினர்.
‘தமிழக மின்சார ஒழுங்குமுறை ஆணையத்திற்கு சட்ட அதிகாரி மூன்று மாதங்களுக்குள் நியமிக்கப்படுவார்’ என, தமிழகஅரசு சார்பில் பதில் அளிக்கப்பட்டது.
அதுவரை, மின் கட்டணஉயர்வுக்கு தடை விதிக்குமாறு, நுாற்பாலைகள் சங்கம் சார்பில் கோரிக்கை விடுக்கப்பட்டது.
இருதரப்பு வாதங்களையும் கேட்ட நீதிபதிகள் பிறப்பித்த உத்தரவு:
தமிழக மின்சார ஒழுங்குமுறை ஆணையத்திற்கு சட்ட அதிகாரியை மூன்று மாதங்களுக்குள் தமிழக அரசு நியமிக்க வேண்டும். ஒருவேளை நியமிக்காவிட்டால், மனுதாரர் இந்த நீதிமன்றத்தில் மீண்டும் முறையிடலாம்.
தமிழக அரசின் மின் கட்டண உயர்வு நடவடிக்கைக்கு தடை விதிக்க முடியாது. தமிழக மின்சார ஒழுங்குமுறை ஆணையத்திற்கு எதிரான இந்த மனு தள்ளுபடி செய்யப்படுகிறது.
இவ்வாறு நீதிபதிகள் உத்தரவிட்டனர்.
புதிய செய்திகளுக்கு தினமலர் சேனலை Subscribe செய்யுங்கள்