ஐசிசி தேர்தலில் போட்டியிட சவுரவ் கங்குலியை அனுமதிக்க வேண்டும் என, மேற்கு வங்க மாநில முதலமைச்சர் மம்தா பானர்ஜி, பிரதமர் நரேந்திர மோடிக்கு கோரிக்கை விடுத்துள்ளார்.
பிசிசிஐ எனப்படும் இந்திய கிரிக்கெட் கட்டுப்பாட்டு வாரியத்தின் தலைவராக, கடந்த மூன்று ஆண்டுகளாக, இந்திய கிரிக்கெட் அணியின் முன்னாள் கேப்டன் சவுரவ் கங்குலி பதவி வகித்து வருகிறார். இதன் செயலாளராக, பாஜக மூத்தத் தலைவரும், மத்திய உள்துறை அமைச்சருமான அமித் ஷாவின் மகன், ஜெய் ஷா உள்ளார். சவுரவ் கங்குலி, ஜெய் ஷா ஆகியோர், அவரவர் பதவிகளில் தொடர்ந்து நீடிக்க, கடந்த சில வாரங்களுக்கு முன்பு நீதிமன்றம் அனுமதி வழங்கியது.
இதற்கிடையே, பிசிசிஐ தலைவர் பதவியில் இருந்து விலக சவுரவ் கங்குலி முடிவு செய்து உள்ளதாகவும், அவருக்கு பதிலாக, இந்திய கிரிக்கெட் அணியின் முன்னாள் வீரர் ரோஜர் பின்னி, புதிய தலைவராக நியமனம் செய்யப்பட இருப்பதாகவும் தகவல் வெளியாகி உள்ளது.
ஐசிசி தலைவர் தேர்தலில் போட்டியிட சவுரவ் கங்குலி விருப்பம் தெரிவித்ததாகவும், அதற்கு, பிசிசிஐ உறுப்பினர்கள் ஆதரவு தெரிவிக்கவில்லை என்றும், அதன் காரணமாகவே, பிசிசிஐ தலைவர் பதவியில் நீடிக்க, கங்குலி விரும்பவில்லை என்றும் கூறப்படுகிறது.
இந்நிலையில், மேற்கு வங்க மாநிலத் தலைநகர் கொல்கத்தாவில், திரிணாமுல் காங்கிரஸ் கட்சித் தலைவரும், அம்மாநில முதலமைச்சருமான மம்தா பானர்ஜி செய்தியாளர்களிடம் கூறியதாவது:
சவுரவ் கங்குலி மிக பிரபலமான நபர். இந்திய கிரிக்கெட் அணியின் கேப்டனாகவும் இருந்து உள்ளார். நாட்டிற்காக பல்வேறு செயல்களை அவர் செய்துள்ளார். சவுரவ் கங்குலி மேற்கு வங்க மாநிலத்தின் பெருமை மட்டும் கிடையாது.
அவர் ஒட்டு மொத்த இந்தியாவின் பெருமை. அவர் ஏன் இவ்வளவு நியாயமற்ற முறையில் ஒதுக்கப்பட்டார்? சவுரவ் கங்குலி, ஜெய் ஷா ஆகியோர் தங்களது பதவிகளில் தொடர நீதிமன்றம் அனுமதி வழங்கி உள்ள நிலையில், கங்குலி மட்டும் ஏன் ஒதுக்கப்பட்டார்? சவுரவ் கங்குலி மீது கவனம் செலுத்தி அவரை ஐசிசி தேர்தலில் போட்டியிட அனுமதி அளிக்க வேண்டும் என்று பிரதமர் நரேந்திர மோடியிடம் கேட்டுக் கொள்கிறேன்.
இவ்வாறு அவர் கூறினார்.
ஐசிசி தலைவர் பதவிக்கு வரும் 20 ஆம் தேதி வேட்பு மனு தாக்கல் செய்யப்பட வேண்டும். ஐசிசி தலைவர் பதவிக்கு சவுரவ் கங்குலி போட்டியிட்டால் பிசிசிஐ ஆதரவுடன் அவர் எளிதில் வெற்றி பெறுவார் என்பது குறிப்பிடத்தக்கது.