அமைச்சர்கள் ஒருவருக்கொருவர் பொது வெளியில் கருத்துத் தெரிவிப்பதை முதலமைச்சர் தடுக்க நடவடிக்கை எடுப்பாரா என்ற கோரிக்கை எழுந்துள்ளது.
முதலமைச்சர் மு.க.ஸ்டாலின் தலைமையிலான தமிழக அமைச்சரவையில், நிதித் துறை அமைச்சராக இருப்பவர், மதுரை மத்திய சட்டப்பேரவைத் தொகுதி உறுப்பினர் பிடிஆர். பழனிவேல் தியாகராஜன். நிதி மேலாண்மையில் அனுபவம் பெற்ற இவரை, நிதித் துறைக்கு அமைச்சராக முதலமைச்சர் மு.க.ஸ்டாலின் நியமித்தது, பலரது பாராட்டுகளை பெற்றது.
இந்நிலையில், நிதித் துறை அமைச்சர் பிடிஆர். பழனிவேல் தியாகராஜன் பற்றிய பேச்சுகள் தான், தற்போது தமிழக அரசியல் வட்டாரங்களில் ஹாட் டாப்பிக்காக இருக்கிறது. அண்மையில் நேர்காணல் ஒன்றில் பேசிய அமைச்சர் பிடிஆர். பழனிவேல் தியாகராஜன், “மது உற்பத்தி மற்றும் விற்பனையில் மர்மங்கள் நிறைந்திருப்பதாகவும், அரசின் கவனத்திற்கு வராத வகையில் குளறுபடிகள் நடப்பதாகவும்” குற்றம் சாட்டினார்.
இந்த விவகாரம் அடங்குவதற்குள், “கூட்டுறவுத் துறை செயல்பாடுகள் திருப்தி அளிக்கவில்லை,” என அமைச்சர் பிடிஆர். பழனிவேல் தியாகராஜன் பொது வெளியில் பேசினார். இதற்கு, சம்பந்தப்பட்ட துறை அமைச்சர் ஐ.பெரியசாமி விளக்கம் அளித்து விட்டார். இது குறித்து அவர் கூறுகையில், “நான் 50 ஆண்டு காலமாக அரசியலில் இருக்கிறேன். மக்களும், முதல்வரும் திருப்தி அடைந்தால் போதும். ரேஷன் கடையை பற்றி தெரியாதவர்கள் திருப்தி அடைய வேண்டிய அவசியம் இல்லை,” என கூறினார்.
இந்நிலையில்,
அமைச்சர்கள் இப்படி பொது வெளியில் ஒருவருக்கொருவர் கருத்து மோதலில் ஈடுபடுவது, திமுக தலைமைக்கு தலைவலியை ஏற்படுத்தி உள்ளது.
இது குறித்து திமுக மூத்த நிர்வாகிகள் கூறியதாவது:
முதலமைச்சர் மு.க.ஸ்டாலின் தலைமையிலான திமுக அரசு சிறப்பாக செயல்பட்டு வருகிறது. திராவிட மாடலை இலக்காக கொண்டு பயணிக்கும் இந்த ஆட்சியின் பல்வேறு நலத்திட்டங்களை மற்ற மாநில அரசுகள் கடைபிடிக்கின்றன.
திமுக ஆட்சி சிறப்பாக நடந்து கொண்டிருக்கும் நிலையில், அமைச்சர்கள் இவ்வாறு பொது வெளியில் கருத்து மோதலில் ஈடுபடுவது, பொது மக்களிடையே கட்சிக்கும், ஆட்சிக்கும் கெட்டப் பெயரை ஏற்படுத்தி விடும். மேலும், இது எதிர்க்கட்சிகளுக்கு நல்வாய்ப்பாக அமைந்து விடும். எனவே, முதலமைச்சர் மு.க.ஸ்டாலின் இந்த விவகாரத்தில் உடனடியாக தலையிட்டு அமைச்சர்களுக்கு உரிய அறிவுறுத்தல்களை வழங்க வேண்டும்.
இவ்வாறு அவர்கள் கூறினர்.