தமிழகத்தில் வடகிழக்கு பருவமழை கடந்த நவம்பர் 28ம் தேதி தொடங்கியது. வழக்கத்திற்கு மாறாக நடப்பு ஆண்டில் அதிக புயல்கள் உருவாகும் எனவும், அதிக
மழை
பொழிவு இருக்கும் எனவும் இந்திய வானிலை ஆய்வு மையம் தெரிவித்தது. அதன்படி தற்போது தென் மேற்கு வங்கக்கடல் மற்றும் தென் கிழக்கு வங்கக்கடல் பகுதியில் நிலவிய ஆழ்ந்த காற்றழத்த தாழ்வு மண்டலமானது “மாண்டஸ்” புயலாக வலுவடைந்தது.
இது மேற்கு வடமேற்கு திசையில் நகர்ந்து புதுச்சேரி மற்றும் ஸ்ரீஹரி கோட்டவிற்கு இடையே 09.12.2022 அன்று நள்ளிரவு கரையை கடக்கக்கூடும் என்று இந்திய வானிலை ஆய்வு மையம் தெரிவித்துள்ளது. இதன் காரணமாக 08-12-2022 முதல் 11-12-2022 வரை 4 நாட்களுக்கு தமிழ்நாட்டில் பல்வேறு மாவட்டங்களில் கனமழை முதல் அதி கனமழை பெய்யக்கூடும் என்றும், கடலோரப் பகுதிகளில் மணிக்கு 50 முதல் 70 கிலோ மீட்டர் வரை பலத்த காற்று மற்றும் தரைக்காற்று வீசக்கூடும் என்றும் இந்திய வானிலை ஆய்வு மையம் எச்சரித்துள்ளது.
சென்னையை நோக்கி புயல் நெருங்கியதால், காற்றின் வேகமும் அதிகரித்து வருகிறது. அதன் காரணமாக தமிழகத்தின் பல்வேறு மாவட்டங்களிலும், புதுச்சேரி மற்றும் காரைக்கால் பகுதிகளிலும் நேற்று முதலே தொடர்ந்து சூறைக் காற்றுடன் மழை பெய்துவருகிறது. இன்று வரை பெய்து வரும் தொடர் மழை பொழிவால் பல்வேறு இடங்களில் நீர் தேங்கி வெள்ளம் சூழந்துள்ளது. மேலும் பல்வேறு பகுதிகளில் சுரங்கப்பாதைகள், சாலைகளில் வெள்ள நீர் சூழ்ந்து கடும் போக்குவரத்து பாதிப்பு ஏற்பட்டுள்ளது.
இதனால் மக்களின் அன்றாட வாழ்க்கை பாதிக்கப்பட்டது. புயல் கடக்கும் கடற்கரை மற்றும் அதை ஒட்டிய பகுதிகளான சென்னை, திருவள்ளூர், காஞ்சிபுரம் மற்றும் செங்கல்பட்டு மாவட்டங்களில் அதிக பாதிப்புகள் ஏற்பட்டது. நாளை அதிகாலை புயல் கரையைக் கடக்கும் என்று சென்னை வானிலை ஆய்வு மையம் தெரிவித்தது. அதனால் இன்று நள்ளிரவு பல்வேறு மாவட்டங்களில் கனமழை பெய்யும் என்றும் எச்சரித்துள்ளது.
இந்தநிலையில் தற்போது மாண்டஸ் புயலின் வெளிப்புற பகுதி மாமல்லபுரத்தை கடக்க தொடங்கியது. அதனால் சென்னை மற்றும் காஞ்சிபுரம் கடற்கரையோர பகுதிகளில் பலத்த சூறாவளிக் காற்று வீசிவருகிறது. சூறாவளி காற்றுடன் தொடர் மழை பெய்துவருவதால் சென்னையில் பல்வேறு பகுதிகளில் மழைநீர் சூழ்ந்து வெள்ளக்காடாக காட்சியளிக்கிறது.
இந்தநிலையில் கிழக்கு கடற்கரையோர சாலையான ஈசிஆரில் சைக்கிளிங் செய்ய தடை விதிக்கப்பட்டுள்ளது. சென்னை மற்றும் புறநகர் பகுதிகளில் வாழும் மக்கள், வார இறுதி நாட்களில் ஈசிஆர்ரில் சைக்கிளிங் செய்வது வழக்கம். கடல் காற்றை சுவாசித்துக் கொண்டே சைக்கிளிங் செய்வதில் மக்கள் ஆர்வம் கொண்டுள்ளனர்.
இந்தநிலையில் மாண்டஸ் புயல் காரணமாக, சென்னை ஈ.சி.ஆர். சாலையில் நாளை ஒரு நாள் சைக்கிளிங் செய்ய தடை விதிக்கப்பட்டுள்ளது. இது சைக்கிளிங் செய்வோர் மத்தியில் வருத்தத்தை ஏற்படுத்தியுள்ளது.