46 வயதே நிரம்பிய ஈரோடு கிழக்கு சட்டமன்ற தொகுதியின்
காங்கிரஸ்
கட்சி எம்.எல்.ஏ திருமகன் ஈவேரா, கடந்த 4ஆம் தேதி மாரடைப்பு ஏற்பட்டு திடீரென உயிரிழந்தார். இது தமிழக அரசியலில் பெரும் சோகத்தை ஏற்படுத்தியது. முதல்வர் மு.க.ஸ்டாலின் முதல் பல்வேறு அரசியல் கட்சி தலைவர்கள் வரை பலரும் நேரில் சென்று அஞ்சலி செலுத்தினர். இதையடுத்து ஜனவரி 5ஆம் தேதி இறுதிச் சடங்குகள் நடைபெற்று திருமகன் ஈவேரா உடல் தகனம் செய்யப்பட்டது. இவருக்கு தமிழ்நாடு சட்டப்பேரவை கூட்டத்தொடரில் நேற்றைய தினம் இரங்கல் தெரிவிக்கப்பட்டது.
சட்டப்பேரவை செயலகம் அறிவிப்பு
இந்நிலையில் ஈரோடு கிழக்கு தொகுதி எம்.எல்.ஏ பதவி காலியானதாக சட்டப்பேரவை செயலகம் இன்று அதிகாரப்பூர்வமாக அறிவிப்பு வெளியிட்டுள்ளது. தொகுதி காலியாக இருக்கும் தகவலை இந்திய தேர்தல் ஆணையத்திற்கு தமிழ்நாடு தலைமை தேர்தல் அதிகாரி அனுப்பி வைப்பார் எனத் தகவல்கள் தெரிவிக்கின்றன. இதன்மூலம் அடுத்த 6 மாதங்களுக்குள் ஈரோடு கிழக்கு தொகுதிக்கு இடைத்தேர்தல் நடத்த வேண்டிய கட்டாயம் ஏற்பட்டுள்ளது.
காங்கிரஸ் வெற்றி
கடந்த 2021 சட்டப்பேரவை தேர்தலில் ஈரோடு கிழக்கு தொகுதியானது
திமுக
கூட்டணியில் இடம்பெற்றிருந்த காங்கிரஸ் வசம் ஒப்படைக்கப்பட்டது. இவர் 67,300 வாக்குகள் பெற்று வெற்றி பெற்றார். இவரை எதிர்த்து போட்டியிட்ட அதிமுக கூட்டணியில் இடம்பெற்ற தமிழ் மாநில காங்கிரஸ் கட்சியின் எம்.யுவராஜா 58,396 வாக்குகள் பெற்று இரண்டாம் இடம் பிடித்தார்.
திமுகவின் முடிவு என்ன?
இந்நிலையில் இடைத்தேர்தல் அறிவிப்பு வெளியாகும் பட்சத்தில் ஈரோடு கிழக்கு தொகுதி மீண்டும் காங்கிரஸ் வசம் ஒப்படைக்கப்படுமா? இல்லை திமுக தன்வசம் எடுத்து கொள்ளுமா?என்ற கேள்வி எழுந்துள்ளது. ஏற்கனவே தேர்தலுக்கு முந்தைய ஒப்பந்தத்தின் படி, தனது கூட்டணி தர்மத்தை காப்பாற்றும் வகையில் காங்கிரஸ் வசமே ஈரோடு கிழக்கு தொகுதி இருப்பதற்கு திமுக அனுமதிக்கும்.
அதிமுக என்ன செய்யப் போகிறது?
இதற்கு அதிக வாய்ப்புகள் இருப்பதாக தெரிகிறது. இது திருமகன் ஈவேரா மறைவால் அனுதாப ஓட்டுகளை பெற வழிவகுக்கும் எனச் சொல்லப்படுகிறது. அதேசமயம் காங்கிரஸை எதிர்த்து அதிமுக தரப்பில் யார் நிற்கப் போகிறார்கள் என்ற எதிர்பார்ப்பும் ஏற்பட்டுள்ளது. தற்போது உட்கட்சி பூசலில் தவித்து வருகிறது. கடைசியாக தமிழ்நாடு தேர்தல் ஆணையத்தில் இருந்து வந்த கடிதத்தையும் எடப்பாடி தரப்பு திருப்பி அனுப்பி விட்டது.
தகிக்கும் உட்கட்சி பூசல்
எனவே இரட்டை இலை சின்னமும், அதிமுக என்ற அடையாளமும் எங்களுக்கே என
எடப்பாடி பழனிசாமி
கோரிக்கை விடுத்தால் ஓ.பன்னீர்செல்வம் சும்மா இருக்க மாட்டார். கடைசியில் சின்னத்தை முடக்கும் நிலைக்கு தான் கொண்டு செல்லும் என்கின்றனர். இத்தகைய சூழலில் கூட்டணி கட்சியான தமிழ் மாநில காங்கிரஸிற்கு மீண்டும் வழிவிடுவதே சிறந்தது.
இடைத்தேர்தல் எப்போது?
அதற்குள் தனது பிரச்சினைகளை தீர்த்து கொள்ளலாம். அதிமுக பொதுக்குழு தொடர்பான வழக்கில் இருதரப்பு வாதங்களும் நிறைவு பெற்று தேதி குறிப்பிடாமல் தீர்ப்பு ஒத்திவைக்கப்பட்டுள்ளது. அது வந்துவிட்டால் யார் கையில் அதிமுக? என்பது தெரிந்துவிடும். அதுவரை இடைத்தேர்தல் அறிவிப்பு வெளியாகும் வாய்ப்புகள் குறைவு தான். பட்ஜெட் கூட்டத்தொடருக்கு பின்னர், ஈரோடு கிழக்கு தொகுதி இடைத்தேர்தல் அறிவிப்பு வெளியாகலாம் எனக் கூறப்படுகிறது.