தமிழ்நாடு முன்னாள் முதலமைச்சர் ஓ.பன்னீர்செல்வம் விரைவில் டெல்லி செல்ல இருப்பதாக தகவல் வெளியாகி உள்ளது.
அதிகார மோதல்
முன்னாள் முதலமைச்சர் செல்வி ஜெ.ஜெயலலிதா மறைவுக்கு பிறகு, அஇஅதிமுகவில், அதிகாரப் போட்டி ஏற்பட்டது. அதிமுக ஆட்சியில் இருக்கும் வரை, இரட்டைத் தலைமை பதவிகளில், ஓ.பன்னீர்செல்வம் –
எடப்பாடி பழனிசாமி
ஆகியோர் இருந்தனர். ஆட்சி மாற்றம் ஏற்பட்ட பிறகு, இரட்டைத் தலைமை விவகாரம் பூதாகரமாக வெடித்தது. ஒற்றைத் தலைமையே வேண்டும் என,
எடப்பாடி பழனிசாமி
பிடிவாதம் பிடிக்க, ஓ.பன்னீர்செல்வம் கடும் எதிர்ப்புத் தெரிவித்தார்.
இபிஎஸ் கை ஓங்கியது
ஒரு வழியாக ஓ.பன்னீர்செல்வத்தின் எதிர்ப்புகளை தாண்டி, கடந்த 2022 ஆம் ஆண்டு ஜூலை மாதம் 11 ஆம் தேதி, சென்னை வானகரத்தில் அதிமுக பொதுக்குழுக் கூட்டத்தை நடத்தினார் எடப்பாடி பழனிசாமி. அப்போது அதிமுக இடைக்காலப் பொதுச் செயலாளராக பொதுக்குழு உறுப்பினர்கள் ஆதரவுடன், எடப்பாடி பழனிசாமி தேர்வு செய்யப்பட்டார். இதற்கு எதிர்ப்புத் தெரிவித்த ஓ.பன்னீர்செல்வம் மற்றும் அவரது ஆதரவாளர்கள் கட்சியின் அடிப்படை உறுப்பினர் பொறுப்பில் இருந்து நீக்கப்பட்டனர்.
ஓபிஎஸ் எதிர்ப்பு
இதனால் அதிருப்தி அடைந்த ஓ.பன்னீர்செல்வம், எடப்பாடி பழனிசாமிக்கு எதிராக நீதிமன்றத்தில் முறையீடு செய்தார். இதில் உயர் நீதிமன்றத்தில் எடப்பாடி பழனிசாமி தரப்புக்கு சாதகமான தீர்ப்பு வந்தது. இதை எதிர்த்து உச்ச நீதிமன்றத்தில் ஓ.பன்னீர்செல்வம் மேல் முறையீடு செய்தார். இந்த வழக்கில் தீர்ப்பை தேதி குறிப்பிடாமல் உச்ச நீதிமன்றம் ஒத்தி வைத்துள்ளது.
க்ரீன் சிக்னல்
இந்நிலையில், தமிழ்நாடு முன்னாள் முதலமைச்சர் ஓ.பன்னீர்செல்வம் விரைவில் டெல்லி செல்ல இருப்பதாக தகவல் வெளியாகி உள்ளது. இம்மாத இறுதியில் அவர் டெல்லி செல்ல அதிக வாய்ப்புகள் இருப்பதாகக் கூறப்படுகிறது. அண்மையில், பாஜக மேலிடத் தலைவர்களை சந்திக்க நேரம் கேட்டு ஓ.பன்னீர்செல்வம் அனுப்பிய ஓலைக்கு பச்சைக்கொடி காட்டப்பட்டு உள்ளதாகக் கூறப்படுகிறது.
முக்கிய தலைகளை சந்திக்கும் ஓபிஎஸ்
பிரதமர் நரேந்திர மோடி, மத்திய உள்துறை அமைச்சர் அமித் ஷா, பாஜக தேசியத் தலைவர் ஜே.பி.நட்டா உள்ளிட்டோரை சந்திக்க திட்டமிட்டுள்ள ஓ.பன்னீர்செல்வம், அதிமுக தலைமையாக எடப்பாடி பழனிசாமி அங்கீகரிக்கப்பட்டதற்கு அதிருப்தித் தெரிவிக்க வாய்ப்பு இருப்பதாகக் கூறப்படுகிறது. ஓ.பன்னீர்செல்வத்தின் இந்தப் பயணம் அதிமுகவில் மீண்டும் புயலைக் கிளப்பும் என, எதிர்பார்க்கப்படுகிறது.