தமிழ்நாட்டில் தொடர்ந்து சில தினங்களாக பல்வேறு மாவட்டங்களில் அவ்வப்போது மழை பெய்து வருகிறது. மேற்கு திசை காற்றின் வேக மாறுபாடு காரணமாக இந்த வாரமும் தமிழ்நாட்டில் சில மாவட்டங்களில் மழைக்கு வாய்ப்பு உள்ளதாக தெரிவிக்கப்பட்டுள்ளது.
மிதமான மழையே பெய்து வந்த நிலையில் இந்த வாரம் கனமழைக்கு வாய்ப்புள்ள இடங்கள் குறித்து தெரிவிக்கப்பட்டுள்ளது. இதனால் பள்ளி, கல்லூரி மாணவர்கள் வானிலை அறிக்கைகளை எதிர்நோக்கி காத்திருக்கின்றனர்.
இன்று ஆகஸ்ட் 20ஆம் தேதி தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும் என்று சென்னை வானிலை ஆய்வு மையம் வெளியிட்ட அறிவிப்பில் தெரிவிக்கப்பட்டுள்ளது.
தமிழக பகுதிகளின் மேல் நிலவும் வளி மண்டல கீழடுக்கு ஈழற்சி காரணமாக, நாளை திங்கள் கிழமை (ஆகஸ்ட் 21ஆம் தேதி) தமிழ்நாடு, புதுச்சேரி மற்றும் காரைக்கால் பகுதிகளில் ஒரு சில இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.
தஞ்சாவூர், திருவாரூர், நாகப்பட்டினம், மயிலாடுதுறை, அரியலூர், கடலூர், நிலகிரி மாவட்டங்கள் மற்றும் காரைக்கால் பகுதிகளில் ஓரிரு இடங்களில்
பெய்யவாய்ப்புள்ளது.
நாகப்பட்டினம் மாவட்டத்தில் இடியுடன் கூடிய கனமழை
நாளை மறுதினம் ஆகஸ்ட் 22ஆம் தேதி 17 மாவட்டங்களில் கனமழை பெய்யும் என தெரிவிக்கப்பட்டுள்ளது. மேலும் பல இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.
நீலகிரி, கோயம்புத்தூர், திருப்பூர், தேனி, திண்டுக்கல். மதுரை, சிவகங்கை, புதுக்கோட்டை தஞ்சாவூர், திருவாரூர். நாகப்பட்டினம், மயிலாடுதுறை, பெரம்பலூர், அரியலூர், கடலூர், கள்ளக்குறிச்சி, திருச்சிராப்பள்ளி மாவட்டங்கள் மற்றும் காரைக்கால் பகுதிகளில் ஓரிரு இடங்களில் கனமழை பெய்யவாய்ப்புள்ளது என வானிலை அறிக்கையில் தெரிவிக்கப்பட்டுள்ளது.
ஆகஸ்ட் 23ஆம் தேதி முதல் ஆகஸ்ட் 26ஆம் தேதி ஒருசில இடங்களில் இடி மின்னலுடன் கூடிய லேசானது மதல் மிதமான மழை பெய்யக்கூடும் என குறிப்பிடப்பட்டுள்ளது.
சென்னை மற்றும் புறநகர் பகுதிகளைப் பொறுத்தவரை இன்றும் நாளையும் வானம் ஓரளவு மேகமூட்டத்துடன் காணப்படும். மாநகரின் ஒருசில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும்.
அதே சமயம் அதிகபட்ச வெப்பநிலை 35-36 டிகிரி செல்சியஸ் வரை செல்லக்கூடும். குறைந்தபட்ச வெப்பநிலை 26 டிகிரி செல்சியஸை ஒட்டியும் இருக்கக்கூடும் என்று தெரிவிக்கப்பட்டுள்ளது.