சென்னை:
“இனி எங்கு கஞ்சா உள்ளிட்ட போதைப்பொருட்கள் விற்பனை இருக்கிறதோ அந்த இடத்திற்கு சம்பந்தப்பட்ட போலீஸார் மீது கடுமையான நடவடிக்கை பாயும்” என்று தமிழக முதல்வர் மு.க. ஸ்டாலின் அதிரடியாக எச்சரித்துள்ளார். முதல்வரின் இந்த எச்சரிக்கையானது போலீஸாரை கதிகலங்க செய்திருக்கிறது.
தமிழ்நாட்டில் கடந்த சில ஆண்டுகளாகவே கஞ்சா உள்ளிட்ட போதைப்பொருட்களின் புழக்கம் அதிகரித்துள்ளது. முதலில் அங்கொன்றும் இங்கொன்றுமாக கிடைத்துக் கொண்டிருந்த போதைப்பொருட்கள் தற்போது சர்வசாதாரணமாக கிடைக்கின்றன. குறிப்பாக, கஞ்சாவின் உபயோகம் வெகுவாக அதிகரித்துள்ளது. இதனால் குற்றச்சம்பவங்களும் அதிக அளவில் நடக்கின்றன.
சமீபத்தில் கூட சென்னை பூந்தமல்லியில் போலீஸ் காவலரை அங்கிருந்த இளைஞர்கள் 2 பேர் கஞ்சா போதையில் கத்தியை கொண்டு துரத்திய வீடியோ சமூக வலைதளங்களில் தீயாக பரவி பரபரப்பை ஏற்படுத்தியது. முதல்வர் ஸ்டாலினும் பல முறை காவல்துறையினருடன் நடைபெற்ற கூட்டங்களில் கஞ்சா ஒழிப்பை வலியுறுத்தி வந்தார்.
இந்நிலையில், நாகப்பட்டினம், மயிலாடுதுறை, திருவாரூர், தஞ்சாவூர் ஆகிய மாவட்டங்களில் சட்டம் ஒழுங்கு நிலை குறித்து காவல்துறை உயரதிகாரிகளுடன் முதல்வர் மு.க. ஸ்டாலின் இன்று ஆலோசனை நடத்தினார். அப்போது முதல்வர் ஸ்டாலின் கூறியதாவது:
பொதுமக்கள் ஒரு அவசரத்திற்கும், பாதுகாப்பிற்கும் நாடும் முதல் இடமாக காவல் நிலையங்களும், எஸ்.பி. அலுவலகங்களும் உள்ளன. அவ்வாறு ஒரு புகாரையோ அல்லது குறைகளையோ தெரிவிக்க வரும் பொதுமக்கள் வரும் போது அவர்கள் கூறுவதை போலீஸார் கனிவுடன் கேட்க வேண்டும். பிறகு, அந்த புகார் தொடர்பாக உடனடியாக நடவடிக்கை எடுக்க வேண்டும்.
காவல் நிலையங்களுக்கு வரும் மக்களை நடத்தும் விதத்தில்தான் காவல்துறையின் பிம்பம் கட்டமைக்கப்படும். காவல்துறையின் செயல்பாடுகளே அரசிற்கு நல்ல பெயரை வாங்கி தரும். கஞ்சா உள்ளிட்ட போதைப்பொருட்களை விற்பனை செய்பவர்கள் மீது கடுமையான நடவடிக்கை எடுக்க வேண்டும். இதில் இனி எந்த தவறும் அலட்சியமும் நிகழ்வததை நான் பொறுத்துக் கொள்ள மாட்டேன். போதைப்பொருட்கள் விற்பனை கண்டறியப்பட்டால் சம்பந்தப்பட்ட இடத்தை நிர்வகிக்கும் போலீஸார் மீது கடுமையான நடவடிக்கை பாயும் என்பதை தெரிவித்துக் கொள்கிறேன். இவ்வாறு முதல்வர் கூறினார்.