நெல்லை மாவட்டத்தில் கடந்த சில மாதங்களாகவே வன்முறை சம்பவங்கள் அதிகரித்து வருகின்றன. கடந்த ஒரு மாதத்தில் மட்டும் 20-க்கும் அதிகமானோர் கொலையாகி உள்ளனர். சில வாரங்களுக்கு முன்பு பள்ளி மாணவர்கள் சிலர் யூடியூப் பார்த்து நாட்டு வெடிகுண்டு தயாரித்து வெடிக்கச் செய்தனர். அவர்களை போலீஸார் கைதுசெய்தனர்.
அதைத் தொடர்ந்து நாங்குநேரியைச் சேர்ந்த சின்னதுரை என்ற பள்ளிச் சிறுவனையும் அவனின் சகோதரியையும் சக மாணவர்களே சாதிய வன்மத்துடன் வீடு புகுந்து அரிவாளால் கொடூரமாக வெட்டினார்கள். இருவரும் இப்போது வரையிலும் மருத்துவமனையில் சிகிச்சை பெற்று வருகின்றனர்.
அந்தப் பதற்றத்தில் இருந்து மக்கள் இன்னும் வெளியே வராத நிலையில், இளைஞர்கள் சிலர் நெல்லை மாநகர எல்லைக்குள் நாட்டு வெடிகுண்டு தயாரித்து வெடிக்கச் செய்திருக்கிறார்கள். அதை அவர்களே வீடியோவாகப் பதிவுசெய்து சமூக வலைதளப் பக்கங்களில் பதிவேற்றம் செய்திருக்கிறார்கள். அதன் மூலமாகவே அவர்கள் நாட்டு வெடிகுண்டு தயாரித்த விவரம் வெளியில் தெரியவந்திருக்கிறது.
அந்த வீடியோவில், இளைஞர்களில் ஒருவர் தன் கைகளில் நாட்டு வெடிகுண்டை வைத்து ஆர்வத்துடன் பார்க்கிறார். உடனே அதை வாங்கும் மற்றொருவர், சாவகாசமாக அதை வயல் பகுதிக்குள் வீசுகிறார். கீழே விழுந்ததும் நெருப்பு பற்றி எரிகிறது. அந்த வீடியோ வைரலான நிலையில், போலீஸார் விசாரணையை தீவிரப்படுத்தினர். அதில் நெல்லை டவுன் அரசன் நகரைச் சேர்ந்த ரஞ்சித் (19), ஆசாத் நகரை சேர்ந்த முகமது தௌபிக் (23), சல்மான் (28) ஆகிய மூவரும் நாட்டு வெடிகுண்டு தயாரித்தது தெரியவந்தது.
நாட்டு வெடிகுண்டு தயாரித்து வெடித்தது தொடர்பாக நெல்லை டவுன் போலீஸார் இரு பிரிவுகளில் வழக்கு பதிவுசெய்து, விசாரணை நடத்தி ரஞ்சித், முகமது தௌபிக் ஆகிய இருவரையும் கைதுசெய்து சிறையில் அடைத்தனர். இந்தச் சம்பவத்தில் மூளையாகச் செயல்பட்ட சல்மான் என்பவர் தலைமறைவாக இருப்பதால் அவரைத் தேடி வருகின்றனர்.
இது குறித்து போலீஸாரிடம் கேட்டபோது, “நெல்லை மாநகரப் பகுதியில் உள்ள வயல்காட்டில் இளைஞர்கள் சிலர் நாட்டு வெடிகுண்டை வெடிக்கச் செய்தது தெரியவந்ததால், அது தொடர்பான வீடியோ மூலம் விசாரணை நடத்தினோம். அதில், சம்பவம் நடந்தது நெல்லை நகரப் பகுதி என்று தெரிந்ததால் அங்கு சென்று வீடியோவில் இருக்கும் நபர்கள் குறித்து விசாரித்தோம். அதன் பின்னரே இருவரைக் கைதுசெய்தோம்.
பிடிபட்டவர்கள் அளித்த வாக்குமூலத்தில், கோயில் விழாக்கள் உள்ளிட்ட நிகழ்ச்சிகளில் வெடி வெடிக்கும் தொழில் செய்து வந்த சல்மானுடன் பழக்கம் ஏற்பட்டதும், நாட்டு வெடிகுண்டு வெடித்துப் பார்க்கலாம் என்ற யோசனையில் இப்படிச் செய்திருக்கின்றனர். மூவரும் சேர்ந்து இணையத்தில் நாட்டு வெடிகுண்டு தயாரிப்பது பற்றி தேடிப் படித்துள்ளனர். தயாரித்த பின்னர் அதனை வெடிக்கச் செய்து சோதனை நடத்தியதை வீடியோவாக எடுத்ததை ஒப்புக்கொண்டனர். அவர்களுக்கு வேறு ஏதாவது நாசகாரக் கும்பலுடன் தொடர்பு இருக்குமா என்பது பற்றி விசாரித்து வருகிறோம்” என்று காவல்துறையினர் தெரிவித்தனர். இந்தச் சம்பவம் நெல்லை மாநகரில் பரபரப்பாக விவாதிக்கப்பட்டு வருகிறது.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://bit.ly/3PaAEiY
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://bit.ly/3PaAEiY