புதுடெல்லி: மின்னஞ்சல் வழியாக கடித போக்குவரத்துகளை மேற்கொள்ள உள்நாட்டு நிறுவன தயாரிப்பான சோஹோ மெயிலுக்கு தான் மாறிவிட்டதாக உள்துறை அமைச்சர் அமித் ஷா தெரிவித்துள்ளார்.
இது தொடர்பாக அவர் வெளியிட்டுள்ள எக்ஸ் பதிவில், “நான் சோஹோ மெயிலுக்கு மாறிவிட்டேன். எனது மின்னஞ்சல் முகவரியை குறித்துக்கொள்ளுங்கள். எனது புதிய மின்னஞ்சல் முகவரி [email protected]. எதிர்காலத்தில் மின்னஞ்சல் வழியாக கடிதப் பரிமாற்றம் செய்ய இந்த முகவரியைப் பயன்படுத்தவும். இந்த விஷயம் குறித்து கவனித்ததற்கு நன்றி” என தெரிவித்துள்ளார்.
தமிழ்நாட்டின் சென்னையை தலைமையிடமாகக் கொண்டு செயல்படும் பன்னாட்டு தொழில்நுட்ப நிறுவனமான Zoho Corporation-ஆல் உருவாக்கப்பட்டது Zoho Mail. 2008-ல் தொடங்கப்பட்ட Zoho Mail, வலுவான தனியுரிமை தரநிலைகள் மற்றும் தரவு பாதுகாப்புகளைக் கொண்டுள்ளது என்றும், பயனர்கள் தனியுரிமை சார்ந்த இலவச மின்னஞ்சல் அனுபவத்தைத் தேடுவதால் ஜி-மெயிலுக்கு மாற்றாக Zoho Mail பிரபலமடைந்து வருகிறது என்றும் உள்நாட்டு ஆக்கங்களை விரும்புவோர் தரப்பு கூறுகிறது.
கம்ப்யூட்டரில் நாம் மேற்கொள்ளும் அலுவலக பணிகளுக்கெல்லாம் நாம் வெளிநாட்டு நிறுவனங்களின் மென்பொருட்களைதான் பயன்படுத்தி வருகிறோம். இந்நிலையில், சுதேசிக்கு மாறுமாறு மத்திய அரசு நாட்டு மக்களுக்கு தொடர்ந்து வேண்டுகோள் விடுத்து வருகிறது. இதனால், இந்திய தயாரிப்புகளுக்கான முக்கியத்துவம் நாளுக்கு நாள் அதிகரித்து வருகிறது. இந்நிலையில், சுதேசியை பிரபலப்படுத்தும் முயற்சியாக அமித் ஷாவின் அறிவிப்பு பார்க்கப்படுகிறது.
முன்னதாக, சோஹோ ஆபிஸ் தளத்தை பயன்படுத்துமாறு மத்திய கல்வி அமைச்சகம் தனது துறையின் அனைத்து அலுவலகங்களுக்கும் சமீபத்தில் ஒரு சுற்றறிக்கையை அனுப்பியது. அதில், “சோஹோவின் உள்நாட்டு ஆபிஸ் ஆன்லைன் மென்பொருட்களை பயன்படுத்துவதன் மூலம், சுதேசி இயக்கத்தில் நாம் தைரியமான நடவடிக்கையை எடுக்கிறோம். உள்நாட்டு புதுமையுடன் இந்தியா முன்னேற நாம் அதிகாரம் அளிக்கிறோம். இதன் மூலம் உள்நாட்டு டிஜிட்டல் கட்டமைப்பு வலுவடைந்து, நமது தரவுகள் பாதுகாப்புடையதாகவும், தற்சார்புடையதாகவும் இருக்கும்.
இந்த மாற்றம், உலகளாவிய டிஜிட்டல் பொருளாதாரத்தில், இந்தியாவின் நிலைப்பாட்டை வலுப்படுத்தும். சேவை பொருளாதாரம் என்ற நிலையிலிருந்து உற்பத்தி தேசம் என்ற நிலைக்கு நாடு செல்ல உதவும். மத்திய கல்வித் துறை அமைச்சகத்தின் கீழ் பணியாற்றும் அனைத்து அதிகாரிகளும், அனைத்து அலுவலக ஆவணங்களுக்கும் சோஹோ ஆபிஸ் தளத்தை பயன்படுத்த வேண்டும். சோஹோ ஆபிஸ் தற்போது என்ஐசி மெயிலுடன் ஒருங்கிணைக்கப்பட்டுள்ளது. இதனால் தனி லாகின் அல்லது பதிவிறக்கங்கள் தேவையில்லை.
சோஹோவின் அனைத்து மென்பொருள் உபகரணங்களையும் பயன்படுத்தும் முறைகளை அதிகாரிகள் தெரிந்து வைத்திருக்க வேண்டும். தொழில்நுட்ப உதவிக்கு சிபிஐஎஸ் / என்ஐசி பிரிவை தொடர்பு கொள்ள வேண்டும்” என தெரிவிக்கப்பட்டிருந்தது. சோஹோவின் அரட்டை செயலியும் சமீபகாலமாக பிரபலமடைந்து வருகிறது. வாட்ஸ்அப்புக்கு மாற்றாக ஒரு தரப்பினரால் அரட்டை செயலி பயன்படுத்தப்படுகிறது கவனிக்கத்தக்கது.