நடிகர் விஜய் கடந்த இரண்டு நாட்களாக தனது மக்கள் இயக்க நிர்வாகிகளை சந்தித்து வருகிறார். தமிழகத்தில் 10 மற்றும் 12 ஆம் வகுப்பு பொதுத் தேர்வில் ஒவ்வொரு தொகுதியிலும் முதல் 3 இடங்களை பிடித்த மாணவ மாணவிகளை கடந்த மாதம் நேரில் அழைத்து சந்தித்தார் நடிகர் விஜய். அவர்களுக்கு ஊக்கத்தொகை வழங்கிய நடிகர் விஜய், பொன்னாடை போர்த்தியும் சான்றிதழ் கொடுத்தும் கவுரப்படுத்தினார்.
மேலும் மாணவ மாணவிகளை நாளைய வாக்காளர்களே என்று அழைத்த விஜய், தங்களின் பெற்றோர் ஓட்டுக்கு பணம் வாங்குவதை தடுக்க வேண்டும் என்றார். அம்பேத்கர், பெரியார், காமராஜர் போன்ற தலைவர்கள் குறித்து படிக்க வேண்டும் என்றும் கூறினார் விஜய். சுமார் 13 மணி நேரம் நின்றப்படி தானே அனைத்து மாணவ மாணவிகளுக்கும் பொன்னாடை போர்த்தி சான்றிதழ்களை வழங்கினார்.
நடிகர் விஜய்யின் இந்த செயலுக்கு பாராட்டுக்கள் குவிந்தன. மேலும் அவரது அரசியல் வருகைக்கான முதல் படிதான் இது என்றும் கூறப்பட்டது. இதனை தொடர்ந்து நடிகர் விஜய் கடந்த இரண்டு நாட்களாக தனது மக்கள் இயக்க நிர்வாகிகளை சந்தித்தார். அப்போது மாணவ மாணவிகளுக்கான விருது விழாவை சிறப்பாக செய்ததாக கூறி நிர்வாகிகளை பாராட்டி பேசிய நடிகர் விஜய் நிர்வாகிகளுடன் போட்டோ எடுத்துக்கொண்டதாகவும் கூறப்பட்டது.
மேலும் 234 தொகுதிகளிலும் மாணவ மாணவிகளுக்கு இரவு நேர பாட சாலை அமைக்கவும் நடிகர் விஜய் உத்தரவிட்டதாக நேற்று தகவல் வெளியானது. இதற்கான இடத்தை விஜய்யின் மக்கள் இயக்கத்தினர் தேர்வு செய்வார்கள் என்றும், இந்த இடத்திற்கான வாடகையையும் விஜய் மக்கள் இயக்கம் சார்பிலேயே கொடுக்கப்படும் என்றும் கூறப்பட்டது.
இந்த இரவு நேர பாட சாலை காமராஜர் பிறந்தநாளான வரும் 15ஆம் தேதி முதல் தொடங்கும் என்றும் இதற்கான ஆசிரியர் தேர்வுகள் நடைபெற்று வருவதாகவும் கூறப்பட்டது. விஜய் மக்கள் இயக்கத்தினரின் இந்த திட்டத்திற்கு பாராட்டுக்கள் குவிந்து வரும் நிலையில் விஜய் மக்கள் இயக்கத்தின் அடுத்த அதிரடி திட்டம் குறித்த தகவல் வெளியாகியுள்ளது.
அதாவது நடிகர் விஜய் இலவச ஆடு மாடுகளை வழங்க திட்டமிட்டுள்ளதாக கூறப்படுகிறது. 234 தொகுதிகளிலும் தகுதியானவர்களை தேர்வு செய்யும் பணி தொடங்கி உள்ளதாகவும் தகவல் வெளியாகியுள்ளது. இதனைக் கேட்ட நெட்டிசன்கள் சர்க்கார் படத்தில் இலவசங்களுக்கு எதிராக பேசி, இலவச பொருட்களை தூக்கி உடைத்த நடிகர் விஜய்யா தற்போது இலவச ஆடுமாடுகளை வழங்கப்போகிறார் என கேட்டு வருகின்றனர்.