சென்னை:
தமிழ்நாட்டில் பெரும் விவாதத்திற்கு வித்திட்டுள்ள ‘மாமன்னன்’ திரைப்படத்தை பாமக தலைவர்
பாராட்டியிருப்பது அனைவரின் கவனத்தையும் ஈர்த்துள்ளது. மேலும், இந்த திரைப்படத்தில் பெரும் சர்ச்சைக்குள்ளான ஃபகத் பாசில் கதாபாத்திரம் குறித்தும் அன்புமணி ராமதாஸ் கருத்து தெரிவித்துள்ளார்.
மாரி செல்வராஜ் இயக்கத்தில் அமைச்சர் உதயநிதி ஸ்டாலின், நடிகர் வடிவேலு ஆகியோர் நடித்து வெளியான திரைப்படம் ‘மாமன்னன்’.
தாழ்த்தப்பட்ட சமூகத்தைச் சேர்ந்த ஒருவர் அரசியல் அதிகாரத்திற்கு வந்தாலும் சாதி வன்மம் அவரை எவ்வாறு துரத்துகிறது என்பதையும், அதை உடைத்து வெளியே வர அவரும் அவரது குடும்பத்தினரும் நடத்தும் போராட்டதையும் சொல்வதுதான் ‘மாமன்னன்’ திரைக்கதை.
இந்த திரைப்படத்தில் தாழ்த்தப்பட்ட சமூகத்தைச் சேர்ந்த எம்எல்ஏவாக வடிவேலுவும், அவரை நசுக்கும் வில்லன் கதாபாத்திரத்தில் ஃபகத் பாசிலும் நடித்திருப்பார்கள். ரசிகர்கள் மத்தியில் இந்த திரைப்படம் பெரும் வரவேற்பை பெற்றாலும், ஒருதரப்பினர் இதை சாதி திரைப்படம் என முத்திரை குத்த தொடங்கினர். அதேபோல, அதில் சாதி வெறி பிடித்த கதாபாத்திரமாக வரும் ஃபகத் பாசிலின் ரத்னவேல் கதாபாத்திரத்தை சில சமூகத்தினர் கொண்டாடி வருகின்றனர்.
இந்நிலையில், இதுபற்றி அன்புமணி ராமதாஸிடம் ஒரு தனியார் யூடியூப் சேனலில் நெறியாளர் கேள்வியெழுப்பினார். அதற்கு பதிலளித்து அன்புமணி ராமதாஸ் கூறுகையில், “மாமன்னன் திரைப்படத்தை ஓடிடியில் சமீபத்தில்தான் பார்த்தேன். மிகவும் நல்ல திரைப்படம். எல்லோரும் நன்றாக நடித்துள்ளார்கள். எல்லாவற்றுக்கும் மேலாக, சமூகத்திற்கு தேவையான நல்ல செய்தியை அதில் சொல்லி இருக்கிறார்கள். ஆனால் பிறகு பார்த்தால், அந்த திரைப்படத்தில் நெகட்டிவ் கேரக்டராக வரும் ஃபகத் பாசில் கதாபாத்திரத்தை சிலர் கொண்டாட தொடங்கி இருக்கிறார்கள். கண்டிப்பாக இந்த மனநிலை மாற வேண்டும். அதுதான் எனது விருப்பம். இவ்வாறு அன்புமணி ராமதாஸ் கூறினார்.