தமிழ் ஹீரோக்களில் அடுத்தடுத்து அசத்தல் லைன் அப்களை வைத்திருப்பவர்களில் தனுசுக்குத் தனி இடமுண்டு. அதற்குள் 50 படங்களைத் தாண்டிவிட்டார். தனுஷின் 50-வது படமான ‘ராயன்’ படத்தைக் கோடைக்குக் கொண்டு வரும் முயற்சியில் இருக்கின்றனர். படத்தின் டப்பிங் மற்றும் போஸ்ட் புரொடக்ஷன் வேலைகள் சென்னையில் மும்முரமாக நடந்து வருகின்றன. இதனை அடுத்து தனுஷ் நடிக்க உள்ள படங்கள் குறித்த தகவல்கள் இனி…
‘ராயன்’ படத்தை முடித்த கையோடு, அடுத்து அதேபோல இயக்குநராக மீண்டும் களம் இறங்கிவிட்டார் தனுஷ். ‘நிலவுக்கு என்மேல் என்னடி கோபம்’ என்ற படத்தை இயக்கி வருகிறார். தனுஷின் அக்கா மகன் பவிஷை கதாநாயகனாக அவர் அறிமுகப்படுத்துகிறார். இந்தப் படத்தில் அனிகா, பிரியா பிரகாஷ் வாரியர், மாத்யூ தாமஸ், ரம்யா எனப் பலரும் நடித்து வருகின்றனர். தயாரிப்பும் தனுஷ்தான். லியோன் பிரிட்டோ ஒளிப்பதிவு செய்து வருகிறார். ஜி.வி.பிரகாஷ் இசையமைத்து வருகிறார். இந்தப் படத்தை இந்த ஆண்டு இறுதியில் கொண்டு வரத் திட்டமிட்டு உள்ளனர்.
இதற்கிடையே தனுஷின் 51வது படமான ‘குபேரா’ படப்பிடிப்பும் இன்னொரு பக்கம் நடந்து கொண்டிருக்கிறது. இதில் நாகார்ஜுனா, ராஷ்மிகா மந்தனா எனப் பலரும் நடித்து வருகிறார்கள். ஹைதராபாத்தில் நடந்த முதல் ஷெட்யூல் படப்பிடிப்பை முடித்துக் கொடுத்துவிட்டு, இப்போது தான் இயக்கி வரும் ‘ராயன்’ படத்தின் டப்பிங் வேலைகளிலும், இன்னொரு பக்கம் பவிஷ் நடிக்கும் படப்பிடிப்பையும் கவனித்து வருகிறார். இதற்கிடையே ‘ராயன்’ படத்தின் பேட்ச் வொர்க் வேலைகளும் நடந்து முடிந்திருக்கின்றன.
சேகர் கம்முலா இயக்கி வரும் ‘குபேரா’வின் படப்பிடிப்பு இப்போது பாங்காக்கில் நடைபெற்று வருகிறது. அதில் தனுஷ் பங்கேற்கவில்லை. நாகார்ஜுனாவின் போர்ஷனைப் படமாக்கி வருகிறார்கள். ‘குபேரா’ படத்தை முடித்து விட்டு தனுஷை இயக்க அருண் மாதேஸ்வரன், மாரி செல்வராஜ், அ.வினோத் எனப் பலரும் காத்திருக்கிறார்கள் என்றாலும் அவர் ஏற்கெனவே கமிட்டான இந்திப் படத்திற்குத்தான் செல்வார் என்கிறார்கள். பாலிவுட்டில் ‘அட்ராங்கி ரே’யை இயக்கிய ஆனந்த் எல்.ராயின் படப்பிடிப்பு தொடங்கப்படலாம் என்றும் தகவல். தனுஷின் இந்தி படமான ‘ஷமிதாப்’பை இயக்கிய பால்கியின் இயக்கத்தில் இளையராஜாவின் பயோபிக் படத்திற்கான வேலைகளும் இன்னொரு பக்கம் நடந்து வருகின்றன.