வொர்செஸ்டர்,
இந்திய ஜூனியர் கிரிக்கெட் அணி (19 வயதுக்குட்பட்டோர்) இங்கிலாந்தில் சுற்றுப்பயணம் மேற்கொண்டு 5 ஒருநாள் மற்றும் 2 டெஸ்ட் போட்டிகள் கொண்ட தொடரில் ஆடி வருகிறது. இவ்விரு அணிகளுக்கு இடையே முதலில் ஒருநாள் தொடர் நடைபெற்று வருகிறது. அதன்படி நடைபெற்ற முதல் 3 போட்டிகளின் முடிவில் இந்திய அணி தொடரில் 2-1 என்ற கணக்கில் முன்னிலையில் இருந்தது.
இதனையடுத்து இவ்விரு அணிகள் இடையிலான 4-வது ஒருநாள் போட்டி வொர்செஸ்டரில் நேற்று நடைபெற்றது. இதில் டாஸ் வென்ற இங்கிலாந்து அணியின் கேப்டன் பந்துவீச்சை தேர்வு செய்தார். தொடர்ந்து முதலில் பேட்டிங் செய்த இந்திய அணி 50 ஓவர்களில் 9 விக்கெட்டுகளை இழந்து 363 ரன்கள் குவித்தது.
அதிரடியில் கலக்கிய சூர்யவன்ஷி வெறும் 78 பந்துகளில் 143 ரன்கள் (10 சிக்சர்கள், 13 பவுண்டரிகள்) அடித்த நிலையில் ஆட்டமிழந்தார். அதில் 52 பந்துகளில் 100 ரன்கள் தொட்ட சூரியவன்ஷி 19 வயதுக்குட்பட்டோர் மற்றும் இளையோர் ஒருநாள் கிரிக்கெட் வரலாற்றில் குறைந்த பந்துகளில் சதம் விளாசிய வீரர் என்ற உலக சாதனையை படைத்தார்.
இதனையடுத்து 364 ரன்கள் அடித்தால் வெற்றி என்ற இமாலய இலக்கை நோக்கி களமிறங்கிய இங்கிலாந்து 45.3 ஓவரில் அனைத்து விக்கெட்டையும் இழந்து 308 ரன்னுக்கு ஆல் அவுட் ஆனது. இங்கிலாந்து தரப்பில் அதிகபட்சமாக ராக்கி பிளிண்டாப் 107 ரன் எடுத்தார். இந்தியா தரப்பில் நமன் புஷ்பாக் 3 விக்கெட் வீழ்த்தினார்.
இந்நிலையில் இங்கிலாந்து டெஸ்ட் தொடரில் அசத்தி வரும் சுப்மன் கில்லை உத்வேகமாக எடுத்து கொண்டு அடுத்த போட்டியில் 200 ரன்கள் அடிக்க முயற்சிப்பேன் என்று வைபவ் சூர்யவன்ஷி தெரிவித்துள்ளார்.
இது குறித்து பேசிய அவர் கூறுகையில், ” உலக சாதனை படைத்தேன் என்பது எனக்குத் தெரியாது. 100 ரன்கள் அடித்த பின் எங்களுடைய அணி மேலாளர் அங்கித் சார்தான் நான் சாதனை படைத்ததாக சொன்னார். அடுத்த போட்டியில் நான் 200 ரன்கள் அடிக்க முயற்சி செய்வேன். முழுமையாக 50 ஓவர்கள் விளையாட முயற்சிப்பேன். நான் எவ்வளவு ரன்கள் அடிக்கிறேனோ அணி அந்த அளவு பயன்பெறும்.
சுப்மன் கில்லிடமிருந்து நான் உத்வேகத்தை பெற்றேன். 100 ரன்கள் அடித்த பின்பும் ஓயாத அவர் 200 ரன்கள் அடித்து அணியை முன்னோக்கி எடுத்து சென்றார். நான் அவுட்டான பின் 20 ஓவர்கள் இருந்தது. எனவே என்னுடைய 100 சதவீத பங்களிப்பை நான் கொடுக்கவில்லை. இனிமேல் கில் போல நீண்ட இன்னிங்ஸ் விளையாட முயற்சிப்பேன்” என்று கூறினார்.