தினகரன்

சென்னை: போக்குவரத்துக் கழகம் ரூ.48,000 கோடி நஷ்டத்தில் இயங்கி வருவதால் அனைத்து பேருந்துகளிலும் இலவச பயணம் வழங்க இயலவில்லை என அமைச்சர் ராஜகண்ணப்பன் சட்டப்பேரவையில் பதில் அளித்துள்ளார். அனைத்து பேருந்துகளிலும் பெண்கள் இலவசமாக பயணிக்க நடவடிக்கை எடுக்க வேண்டும் என எம்.எல்.ஏ. செல்லூர் ராஜூ கேள்வி எழுப்பிய நிலையில் அமைச்சர் ராஜகண்ணப்பன் பதில் அளித்துள்ளார்.

மதுரை: திருப்பரங்குன்றம் சுப்பிரமணிய சுவாமி கோவிலில் பங்குனி தேரோட்டம் கோலாகலமாக நடைபெற்று வருகிறது. தேரோட்டத்தில் ஏராளமான பக்தர்கள் பங்கேற்று சாமி தரிசனம் செய்தனர். பங்குனி திருவிழா கடந்த 8-ம் தேதி கொடியேற்றத்துடன் தொடங்கியது.

ராமநாதபுரம்: தனுஷ்கோடி அருகே மூன்றாம் தீடை பகுதியில் நின்று கொண்டிருந்த இலங்கை அகதிகளிடம் விசாரணை நடைபெற்று வருகிறது. இலங்கையிலிருந்து அகதிகளாக வந்த 3 சிறுவர் உள்பட 6 பேரிடம் கியூ பிரிவு, மரைன் போலீசார் விசாரணை நடத்தி வருகின்றனர்.

சென்னை: சென்னை மெரினா காமராஜர் சாலையில் பைக் சாகசத்தில் ஈடுபட்ட 8 பேருக்கும் ஏப்ரல் 4-ம் தேதி வரை நீதிமன்ற காவலில் வைக்க உத்தரவிடப்பட்டுள்ளது. இந்த உத்தரவை தொடர்ந்துல், சாதிக், ஆசிப், ரஹ்மத்துல்லா, முகேஷ், ஹரிஹரன், ரோமன் ஆகிய 6 பேர் சைதாப்பேட்டை கிளைச் சிறையில் அடைக்கப்பட்டுள்ளனர். 2 சிறார்கள் சென்னை கெல்லீஸ் அரசு கூர்நோக்கு இல்லத்தில் அடைக்கப்பட்டனர்.

திருச்சி: தமிழ்நாட்டில் சேலம், திருச்சி, தேனி மாவட்டங்களில் இரவில் கனமழை மழை பெய்தது. அந்தமான் தீவுகளுக்கு அருகே நிலவும் காற்றழுத்த தாழ்வுமண்டலம் காரணமாக தமிழகத்தின் சில இடங்களில் மழை பெய்துள்ளது. கடந்த சில நாட்களாக கோடை வெயில் அதிகரித்துள்ள நிலையில் நேற்று இரவு பெய்த மழையால் மக்கள் மகிழ்ச்சியடைந்துள்ளனர்.

சென்னை: சென்னையில் வீட்டு உபயோக சிலிண்டர் விலை ரூ.50 உயர்ந்துள்ளது. கடந்த சில மாதங்களாக ரூ.917-ஆக இருந்த சிலிண்டர் விலை ரூ.50 உயர்ந்து ரூ.967-க்கு விற்பனையாகிறது.