தென்காசி மாவட்டம் புளியங்குடி சேர்ந்தவர் முத்துகிருஷ்ணன் (24). மாணவர் பத்திரிகையாளர் பயிற்சி திட்டத்தை நிறைவு செய்து விட்டு தற்போது தனியார் டிவி டிஜிட்டல் பிரிவு பத்திரிகையாளராக சென்னை அலுவலகத்தில் பணியாற்றி வந்தார்.
இந்த நிலையில் நேற்று 22ம் தேதி சனிக்கிழமை இரவு பணியை முடித்துவிட்டு அலுவலகத்தில் இருந்து ஜாபர்கான்பேட்டை வழியாக காசி தியேட்டர் அருகே நடந்து சென்று கொண்டு இருந்தார்.
ஜூஸ் வாங்கி குடித்துக்கொண்டே முத்துகிருஷ்ணன் நடக்கும்போது அந்த வழியாக வாகனம் வந்ததால் சாலையில் ஒதுங்கியபோது மூடப்படாமல் இருந்த மழைநீர் வடிகால் கால்வாய் பள்ளத்தில் கீழே விழுந்து இருக்கிறார்.
இவர் விழுந்ததை யாரும் பார்க்காததால் அரை மணி நேரத்திற்கும் மேலாக எவராலும் கண்டுபிடிக்க முடியாமல் இருந்துள்ளது. ஆனாலும் கழிவுநீருக்குள் உயிருக்கு போராடிய முத்துகிருஷ்ணனை அந்த வழியே சென்ற தனியார் நிறுவன காவலாளி பார்த்து மீட்டுள்ளார்.
இதன் பிறகு, ஆட்டோவில் முத்துகிருஷ்ணன் தங்கி இருந்த கந்தன்சாவடி பகுதிக்கு அனுப்பி வைத்து உள்ளார். படுகாயங்களுடன் வந்த முத்துகிருஷ்ணனை அவரது நண்பர்கள் உடனே தனியார் மருத்துவமனைக்கு அழைத்து சென்றுள்ளனர்.
அங்கு முதலுதவி அளிக்கப்பட்டு, மேல் சிகிச்சைக்காக ராயப்பேட்டை அரசு மருத்துவமனையில் முத்துக்கிருஷ்ணன் அனுமதிக்கப்பட்டுள்ளார். அதிக ரத்தப்போக்கு ஏற்பட்டதால் சுய நினைவை இழந்த முத்துக்கிருஷ்ணனை இன்று அமைச்சர் மா.சுப்ரமணியன் நேரில் வந்து பார்த்து மருத்துவர்கள் சந்தித்து அவருக்கு தேவையான சிகிச்சை அளிக்க உத்தரவிட்டார்.
இதை தொடர்ந்து அவருக்கு அறுவை சிகிச்சை நடந்த நிலையில் சிகிச்சை பலனின்றி இன்று பிற்பகலில் முத்துகிருஷ்ணன் பரிதாபமாக உயிரிழந்தார். இதுகுறித்து போலீசார் வழக்குப்பதிவு செய்து விசாரிக்கின்றனர்.
இந்நிலையில் முத்துகிருஷ்ணன் மறைவுக்கு இரங்கல் தெரிவித்த முதலமைச்சர்
அவரது குடும்பத்தினருக்கு 5 லட்ச ரூபாய் நிவாரண உதவி அளித்து உத்தரவிட்டுள்ளார்.
முத்துக்கிருஷ்ணன் உயிர்பலிக்கு காரணமானவர்களை கைது செய்ய வேண்டும். மறைந்த பத்திரிகையாளர் முத்துக்கிருஷ்ணன் குடும்பத்திற்கு ஒரு கோடி ரூபாய் முதல்வர் இழப்பீட்டு தொகை வழங்க வேண்டும் என, சென்னை பத்திரிகையாளர் மன்றத்தின் இணைச் செயலாளார் பாரதி தமிழன் கோரிக்கை விடுத்து இருந்தது குறிப்பிடத்தக்கது.