கர்நாடக மாநிலத்தில் உள்ள காவிரி நீர்ப்பிடிப்பு பகுதிகளில் கடந்த சில நாட்களாக நல்ல பெய்து வந்தது. இதன் காரணமாக காவிரி ஆற்றில் நீர்வரத்து ஒரு லட்சம் கன அடிக்கும் மேல் அதிகரித்தது. இதையடுத்து ஒகேனக்கலில் உள்ள மெயினருவி, ஐந்தருவி, ஐவர் பாணி உள்ளிட்ட அருவிகளில் தண்ணீர் அதிகளவில் கொட்டியது. இதனால் பரிசல் இயக்கவும், அருவிகளில் குளிக்கவும் சுற்றுலா பயணிகளுக்கு தடை விதிக்கப்பட்டிருந்தது.
தற்போது மழையின் தீவிரம் குறைந்துள்ளது. இதையடுத்து காவிரியில் நீர்வரத்து படிப்படியாக சரியத் தொடங்கியுள்ளது. ஒகேனக்கல் காவிரியை பொறுத்தவரையில் 28 ஆயிரம் கன அடியாக இருந்த நீர்வரத்து நேற்று காலை நிலவரப்படி, வினாடிக்கு 20 ஆயிரம் கன அடியாக சரிந்தது. இதனால் அருவிகளில் கொட்டும் நீரின் அளவும் குறைந்துள்ளது.
இதன் காரணமாக 16 நாட்களுக்கு பின்னர், ஒகேனக்கலில் பரிசல் இயக்கவும், அருவிகளில் குளிக்கவும் விதிக்கப்பட்டிருந்த தடை நேற்று முதல் விலக்கிக் கொள்ளப்படுவதாக மாவட்ட நிர்வாகம் சார்பில் தெரிவிக்கப்பட்டது. இந்த அறிவிப்பு சுற்றுலா பயணிகளை மிகுந்த மகிழ்ச்சியில் ஆழ்த்தியது. இதேபோல் மேட்டூர் அணைக்கும் நீர்வரத்து சரியத் தொடங்கியுள்ளது.
50 ஆயிரம் கன அடியாக இருந்த நீர்வரத்து 30 ஆயிரம் கன அடியாக சரிந்தது. நேற்று காலை 8 மணியளவில் நீர்வரத்து 30 ஆயிரம் கன அடியாக காணப்பட்டது. இந்நிலையில் 9.30 மணியளவில் 24 ஆயிரம் கன அடியாகவும் பிற்பகல் 12.30 மணியளவில் 21,500 கன அடியாகவும் சரிவை சந்தித்தது. இதனால் நீர்மின் நிலையங்கள் வழியாக விநாடிக்கு 21,500 கன அடி தண்ணீர் திறக்கப்பட்டு வருகிறது.
நீர்வரத்து சரிந்ததன் விளைவாக உபரிநீர் போக்கியான 16 கண் மதகுகள் வழியாக திறக்கப்படும் தண்ணீரானது நிறுத்தம் செய்யப்பட்டுள்ளது. கடந்த 12ஆம் தேதி இரண்டாவது முறையாக 16 கண் மதகுகள் வழியாக தண்ணீர் திறக்கப்பட்டது. இந்த நிலையில் 14 நாட்களுக்கு பின்னர் நேற்று மீண்டும் நிறுத்தப்பட்டது.
மேட்டூர் அணையின் கிழக்கு மற்றும் மேற்கு கால்வாய் பாசனத்திற்கு திறக்கப்படும் நீரின் அளவு 500 கன அடியாக அதிகரிக்கப்பட்டுள்ளது. அணையின் நீர் இருப்பு தற்போது 93.47 டிஎம்சி யாக உள்ளது. நடப்பு நீர்ப்பாசன ஆண்டில் மேட்டூர் அணைக்கு 590 டி.எம்.சி தண்ணீர் வந்துள்ளது. அணையில் இருந்து 574 டி.எம்.சி தண்ணீர் வெளியேற்றப்பட்டு வருவது குறிப்பிடத்தக்கது.