ஆன்லைன் ரம்மி உள்ளிட்ட சூதாட்ட விளையாட்டுகளுக்கு தடை விதிக்க வேண்டும் என்ற கோரிக்கைகள் நீண்ட நாட்களாக எழுந்து வருகின்றன. கடந்த அதிமுக ஆட்சியில் ஆன்லைன் ரம்மி விளையாட்டிற்கு எதிராகச் சட்டம் ஒன்று இயற்றப்பட்டது. இந்தச் சட்டத்தை ரத்து செய்யக் கோரி சில நிறுவனங்கள் தாக்கல் செய்த மனுக்களை விசாரித்த சென்னை உயர் நீதிமன்றம், இச்சட்டம் போதுமான காரணங்கள் மற்றும் ஆதாரங்களின்றி பிறப்பிக்கப்பட்டுள்ளதாகத் தெரிவித்து, அதனை ரத்து செய்தது.
இதையடுத்து, தமிழகத்தில் ஆட்சி மாற்றம் ஏற்பட்டதும் ஆன்லைன் சூதாட்ட விளையாட்டுகளை தடை செய்யும் சட்டம் கொண்டு வரப்படும் என திமுக அரசு சட்டப்பேரவையில் அறிவித்தது. இது தொடர்பான பரிந்துரைகளை அரசுக்கு அளிக்க ஓய்வு பெற்ற சென்னை உயர் நீதிமன்ற நீதிபதி கே. சந்துரு தலைமையில் குழு ஒன்றை முதல்வர் ஸ்டாலின் அமைத்தார். இக்குழுவினர் தங்களது பரிந்துரைகளை அறிக்கையாக முதல்வர் ஸ்டாலினிடம் சமர்பித்தனர்.
இதையடுத்து, இந்த பரிந்துரைகள் தொடர்பாக அமைச்சரவையில் விவாதிக்கப்பட்டு ஆன்லைன் சூதாட்டத்திற்கு தடை விதிக்கும் அவசரச் சட்ட மசோதாவிற்கு, தமிழ்நாடு அமைச்சரவை ஒப்புதல் அளித்தது. இச்சட்டத்திற்கு ஆளுநர் உடனடியாக ஒப்புதல் அளித்ததால் அரசிதழிலும் வெளியிடப்பட்டது.
அதன் தொடர்ச்சியாக, ஆன்லைன் சூதாட்ட விளையாட்டுகளுக்கு தடை விதிக்கும் வகையிலான நிரந்தர சட்ட மசோதா சட்டப்பேரவையில் கடந்த சில தினங்களுக்கு முன்னர் தாக்கல் செய்யப்பட்டு நிறைவேற்றப்பட்டது. இந்த மசோதாவை ஆளுநரின் ஒப்புதலுக்காக தமிழக அரசு அனுப்பி வைத்த நிலையில், ஆன்லைன் சூதாட்ட விளையாட்டுகளுக்கு தடை விதிக்கும் சட்ட மசோதாவுக்கு ஆளுநர் ஆர்.என்.ரவி ஒப்புதல் அளித்துள்ளார். இதையடுத்து, இந்த சட்டம் அமலுக்கு வந்துள்ளது.
புதிய சட்டத்தின்படி, ஆன்லைன் சூதாட்டத்தில் ஈடுபடும் நபர்களுக்கு மூன்று மாதங்கள் வரை சிறை தண்டனையும் 5,000 ரூபாய் அபராதமும் அல்லது இரண்டும் சேர்த்து தண்டனை விதிக்கப்படும். இதுகுறித்த விளம்பரங்களை ஊடகங்களில் வெளியிட தடை. மீறி விளம்பரங்களை வெளியிடும் நபர்களுக்கு அல்லது நிறுவனங்களுக்கு ஓராண்டு வரை சிறை தண்டனையும் 5 லட்சம் ரூபாய் வரை அபராதமும் விதிக்கப்படும். சூதாட்டத்தில் ஈடுபவர்களுக்கு பணம் அல்லது பொருட்கள் வழங்கும் நபர்களுக்கு 3 ஆண்டுகள் வரை சிறை தண்டனையும் 10 லட்சம் ரூபாய் அபராதமும் விதிக்கப்படும்.