கள்ளக்குறிச்சி மாணவி மரண வழக்கில், பள்ளி கட்டிடம் புலன் விசாரணைக்கு தேவைப்படுகிறதா என விளக்கம் அளிக்க சிபிசிஐடிக்கு சென்னை உயர் நீதிமன்றம் உத்தரவிட்டு உள்ளது.
கள்ளக்குறிச்சி தனியார் பள்ளி மாணவி மரணத்தை கண்டித்து கடந்த ஜூலை மாதம் 17 ஆம் தேதி நடந்த போராட்டம் வன்முறையில் முடிந்தது. பள்ளியில் உள்ள பொருட்கள் சேதப்படுத்தப்பட்டன; பேருந்துகள் தீ வைத்து ஏரிக்கபட்டன. பள்ளி அமைந்துள்ள பகுதி கலவரப் பகுதியாக மாறியதை அடுத்து, பள்ளி மூடப்பட்டது.
தற்போது பள்ளி வளாகம் முழுவதும் சீரமைக்கப்பட்டு விட்டதால், பள்ளியை மீண்டும் திறக்க அனுமதிக்கும்படி உத்தரவிடக் கோரி பள்ளியை நிர்வகிக்கும் லதா கல்வி அறக்கட்டளை சார்பில் சென்னை உயர் நீதிமன்றத்தில் வழக்கு தொடரப்பட்டது.
இந்த வழக்கை விசாரித்த சென்னை உயர் நீதிமன்றம், பள்ளியை மீண்டும் திறப்பதற்கு அனுமதிக்கலாமா என்பது குறித்து தெரிவிக்க தமிழக அரசுக்கு உத்தரவிட்டிருந்தது. இந்த வழக்கு உயர் நீதிமன்ற நீதிபதி சுரேஷ் குமார் முன் மீண்டும் விசாரணைக்கு வந்த போது, அரசுத் தரப்பில் தாக்கல் செய்யப்பட்ட அறிக்கையில், நீதிமன்ற உத்தரவின்படி செயல்படுவதாக தெரிவிக்கப்பட்டது.
தமிழக தலைமை குற்றவியல் வழக்கறிஞர் அசன் முகமது ஜின்னா ஆஜராகி, மாணவி மரணம் குறித்த புலன் விசாரணை இன்னும் முழுமையாக முடிவடையவில்லை என்பதால் சம்பந்தப்பட்ட ஏ பிளாக் கட்டிடம் விசாரணைக்கு தேவைப்படலாம் எனத் தெரிவித்தார். அதற்கு பள்ளி நிர்வாகம் தரப்பில் ஆஜரான மூத்த வழக்கறிஞர் சுந்தரேசன், உயர் நீதிமன்ற உத்தரவின் அடிப்படையில் முழு வளாகமும் சீரமைக்கப்பட்டு விட்டதாக தெரிவித்தார்.
மகளிர் ஆணையம் விசாரித்து அளித்த அறிக்கையில், புலன் விசாரணையில் குறைபாடுகள் இருப்பதால், முழுமையாக விசாரணை முடியும் வரை பள்ளியை திறக்க அனுமதிக்கக் கூடாது என மாணவியின் தந்தை தரப்பு வழக்கறிஞர் சங்கரசுப்பு தெரிவித்தார்.
இதையடுத்து, சிபிசிஐடியை தாமாக முன் வந்து எதிர்மனுதாரராக சேர்த்த நீதிபதி சுரேஷ் குமார், குறிப்பிட்ட அந்த கட்டிடம் புலன் விசாரணைக்கு தேவைப்படுகிறதா என்பது குறித்தும், புலன் விசாரணை எப்போது முடித்து, குற்றப் பத்திரிகை எப்போது தாக்கல் செய்யப்படும் என அறிக்கை அளிக்கும்படி உத்தரவிட்டு, விசாரணையை வரும் 30 ஆம் தேதிக்கு தள்ளி வைத்தார்.