தமிழகத்தில் வடகிழக்கு பருவமழை பெரிய அளவில் தாக்கத்தை ஏற்படுத்தவில்லை. வழக்கமாக சென்னை உள்ளிட்ட வட மாவட்டங்களில் அதிகப்படியான மழைப்பொழிவை அளிக்கும். ஆனால் இம்முறை இருமுறை நல்ல மழையை காட்டியது. அதன்பிறகு வங்கக்கடலில் உருவாகும் காற்றழுத்த தாழ்வு மண்டலம் நிலப் பகுதியை நோக்கி நகராமல் ஏமாற்றம் அளித்தது. கடற்பகுதியிலேயே வலுவிழந்து காணாமல் போனது.
வானிலை மையமும், வானிலை ஆய்வாளர்களும் மழை குறித்து கணிப்பதும், பின்னர் அது ஏமாற்றம் அளிப்பதும் தொடர் கதையாகி வருகிறது. இருப்பினும் சென்னைக்கு ஆதாரமாக விளங்கும் நீர் நிலைகளில் போதிய அளவு தண்ணீர் இருப்பதால் அடுத்து வரும் மாதங்களில் எந்தவொரு பிரச்சினையும் இருக்காது என்று சொல்லப்படுகிறது. இந்நிலையில் அடுத்த பெருமழை எப்போது என்ற கேள்வி பலருக்கும் எழுந்துள்ளது.
இதுதொடர்பாக இந்திய வானிலை ஆய்வு மையம் முக்கியத் தகவல் ஒன்றை வெளியிட்டுள்ளது. அதாவது,
1) –
இன்று (டிசம்பர் 4) தெற்கு அந்தமான் கடலில் வளிமண்டல கீழடுக்கு சுழற்சி ஏற்படும். இதன் காரணமாக வரும் 5ஆம் தேதி தென்கிழக்கு வங்கக் கடல் மற்றும் அதனை ஒட்டியுள்ள தெற்கு அந்தமான் கடலில் குறைந்த காற்றழுத்த தாழ்வு பகுதி உருவாகும்.
2) –
இது மேற்கு மற்றும் வடமேற்கு திசையை நோக்கி நகர்ந்து வரும் 7ஆம் தேதி காலை தென்கிழக்கு வங்கக் கடலில் காற்றழுத்த தாழ்வு மண்டலமாக வலுப்பெறக் கூடும். தொடர்ந்து தென்மேற்கு வங்கக் கடல் பகுதியை நோக்கி நகரும். டிசம்பர் 8ஆம் தேதி காலை வடக்கு தமிழ்நாடு, புதுச்சேரி, தெற்கு ஆந்திர கடலோரப் பகுதியை ஒட்டி நகர வாய்ப்புள்ளது.
3) –
வரும் 4ஆம் தேதி நிகோபார் தீவுகளில் ஓரிரு இடங்களில் லேசானது முதல் பரவலான மழையை எதிர்பார்க்கலாம். 5ஆம் தேதி அந்தமான் மற்றும் நிகோபார் தீவுகளில் பரவலான மழை பெய்யக்கூடும்.
4) –
வங்கக் கடலின் தென்மேற்கு பகுதியை நோக்கி நகரும் குறைந்த காற்றழுத்த தாழ்வு பகுதியானது, வரும் 7ஆம் தேதி நள்ளிரவில் இருந்து தமிழ்நாடு, புதுச்சேரி, காரைக்கால், தெற்கு கடலோர ஆந்திரப் பகுதிகளில் மழைப்பொழிவை தொடங்கி வைக்கும்.
5) –
இது படிப்படியாக அதிகரித்து வட தமிழ்நாடு, புதுச்சேரி, தெற்கு ஆந்திரப் பிரதேசத்தை ஒட்டியுள்ள இடங்களில் வரும் 8ஆம் தேதி கனமழை முதல் மிகக் கனமழை வரை பெய்யக்கூடும்.
6) –
வரும் 4 மற்றும் 5 ஆகிய தேதிகளில் அந்தமான், நிகோபார் தீவுகள் மற்றும் அந்தமான் கடலில் மணிக்கு 40 முதல் 45 கிலோமீட்டர் வேகத்தை பலத்த காற்று வீசக்கூடும். அதிகபட்சமாக 55 கிலோமீட்டர் வேகம் வரை காற்று வீசும்.
7) –
மீனவர்களுக்கு எச்சரிக்கையும் விடப்பட்டுள்ளது. வரும் 4, 5 ஆகிய தேதிகளில் அந்தமான் கடல், 5 முதல் 7ஆம் தேதி வரை தென்கிழக்கு வங்கக் கடல், 6 முதல் 8ஆம் தேதி வரை தென்மேற்கு வங்கக் கடல், 6 முதல் 8ஆம் தேதி வரை இலங்கை கடலோரம் மற்றும் அதனை ஒட்டியுள்ள பகுதிகள், 7 முதல் 9ஆம் தேதி வரை தமிழ்நாடு, புதுச்சேரி, தெற்கு ஆந்திர கடலோரப் பகுதிகளுக்கு மீனவர்கள் செல்ல வேண்டாம் என அறிவுறுத்தப்பட்டுள்ளது.