‛துணிவு' மூன்றாவது பாடல் கேங்க்ஸ்டாவிற்கு வரவேற்பு எப்படி?
எச்.வினோத் இயக்கத்தில் அஜித் நடிப்பில் 'துணிவு' திரைப்படம் உருவாகி உள்ளது. இந்த படத்தில் மஞ்சு வாரியர், சமுத்திரக்கனி, வீரா, ஜான் கொக்கென் உள்ளிட்டோர் முக்கிய கதாபாத்திரத்தில் நடித்துள்ளனர். உண்மை சம்பவத்தை அடிப்படையாக கொண்டு உருவாகி வரும் இப்படத்தின் இறுதிக்கட்ட பணிகள் நடைபெற்று வருகிறது. பொங்கலுக்கு படம் வெளியாகவுள்ளது.
இதையொட்டி இப்படத்தின் அடுத்தடுத்த அப்டேட்டுகள் வெளியாகி வருகின்றன. அந்த வகையில் ஜிப்ரான் இசையில் உருவாகியுள்ள சில்லா சில்லா பாடல் வெளியாகி ரசிகர்களின் கவனத்தை ஈர்த்தது. இதையடுத்து காசேதான் கடவுளடா பாடலும் வெளியாகி ரசிகர்களிடையே உற்சாகத்தை ஏற்படுத்தியுள்ளது.
இந்நிலையில் இப்படத்தின் மூன்றாவது பாடலான கேங்க்ஸ்டா நேற்று மாலை வெளியிடப்பட்டுள்ளது. சீண்டுனா சிரிப்பவன், சுயவழி நடப்பவன் என்ற வரிகள் ரசிகர்களை பெரிதும் கவர்ந்துள்ளது. ஷபீர், விவேகா எழுதிய இந்த பாடலை ஷபீர், ஜிப்ரான் இணைந்து பாடியுள்ளனர். பாடல் வெளியான 21 மணிநேரத்தில் 36 லட்சத்திற்கும் அதிகமான பார்வைகள் கிடைத்தன.