தமிழக முதல்வர்
மு.க.ஸ்டாலின்
லெளியிட்டுள்ள சமூக வலைதளப் பதிவில், “மாண்புமிகு இந்தியப் பிரதமர் திரு.நரேந்திர மோடி அவர்களின் தாயார் திருமதி.ஹீராபென் மோடி அவர்கள் உடல்நலக்குறைவால் மருத்துவமனையில் அனுமதிக்கப்பட்டுள்ளார் என்பதையறிந்து மிகுந்த வேதனையடைந்தேன். அவர் விரைவில் நலம்பெற விழைகிறேன்” என்று ஸ்டாலின் பதிவிட்டுள்ளார்.
அன்பு எல்லையற்றது: ராகுல் காந்தி வெளியிட்டுள்ள விருப்ப செய்தியில், ” தாய்க்கும் மகனுக்கும் இடையிலான அன்பு எல்லையற்றது மற்றும் விலைமதிப்பற்றது. மோடி அவர்களே, இந்த கடினமான நேரத்தில் எனது அன்பும் ஆதரவும் உங்களுடனே இருக்கிறது. உங்கள் அம்மா விரைவில் குணமடைய வேண்டுகிறேன்” என்று ராகுல் காந்தி தெரிவித்துள்ளார்.
பிரதமர் மோடி தாயார் ஹீராபென் மோடி திடீரென உடல் நலக்குறைவு காரணமாக அவதிப்பட்டுள்ளார். இதையடுத்து, அவர் அகமதாபாத்தில் உள்ள யு.என் மேத்தா மருத்துவமனையில் இன்று அனுமதிக்கப்பட்டுள்ளார்.
அங்கு, பிரதமர் நரேந்திர மோடியின் தாயார் ஹீராபென் மோடிக்கு போதிய சிகிச்சைகள் அளிக்கப்பட்டு வருவதாகவும் அவரது உடல்நிலை 24 மணி நேரமும் கண்காணிக்கப்பட்டு வருவதாகவும், மருத்துவர்கள் குழுவினர் தகவல் தெரிவித்து உள்ளனர்.
100 வயதாகும் ஹீராபென் மோடியின் உடல்நிலை தற்போது சிகிச்சைக்கு பிறகு சீராக உள்ளதாக தகவல்கள் தெரிவிக்கின்றன. சமீபத்தில் நடந்து முடிந்த குஜராத் சட்ட மன்றத் தேர்தலின்போது பிரதமர் மோடி தனது தாயாரை காந்தி நகரில் உள்ள அவரது இல்லத்தில் சந்தித்து ஆசி பெற்றார்.
இந்த தேர்தலில் பிரதமர் மோடியின் தாயார் ஹீராபென் மோடி சக்கர நாற்காலியில் உறவினர்கள் உதவியுடன் வாக்கு சாவடிக்கு வருகை தந்து வாக்களித்து சென்றார் என்பது குறிப்பிடத்தக்கது.
மைசூர் அருகே பிரதமர் மோடியின் சகோதரர் பிரகலாத் மோடி மற்றும் அவரது குடும்பத்தினர் காரில் நேற்று சென்றபோது திடீரென விபத்தில் சிக்கினர். இந்த விபத்தில் பிரகலாத் மோடி, அவரது மகன், மருமகள், பேரக்குழந்தை ஆகியோர் காயம் அடைந்ததாகவும் இதையடுத்து அவர்கள் அருகில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வருவதாகவும் தகவல் வெளியாக இருந்தது.
இந்த நிலையில் பிரதமர் மோடியின் தாயார் இன்று மருத்துவமனையில் அனுமதிக்கப்பட்டிருப்பது பாஜக தொண்டர்கள் மத்தியில் அதிர்ச்சியை ஏற்படுத்தி உள்ளது.