சென்னையில் இயங்கிவரும் மத்திய அரசின், கலாஷேத்ரா அறக்கட்டளையின் ருக்மணி தேவி நுண்கலை கல்லூரியில் மாணவிகளுக்குப் பாலியல் தொல்லை அளிக்கப்பட்டிருப்பதாகப் புகார் எழுந்திருக்கிறது. இது தொடர்பாக மத்திய கலாசார அமைச்சகத்துக்கும், தமிழ்நாடு முதல்வருக்கும் கலாஷேத்ரா அறக்கட்டளையின் மாணவர்கள் கடிதம் எழுதியிருக்கின்றனர்.
இந்த நிலையில், நடைபெற்றுவரும் சட்டப்பேரவைக் கூட்டத்தில், இந்த விவகாரத்தில் முதல்வர் நடவடிக்கை வேண்டும் என கவன ஈர்ப்பு தீர்மானம் கொண்டுவரப்பட்டது. அதைத் தொடர்ந்து முதல்வர் ஸ்டாலின், இது குறித்து சட்டப்பேரவையில் விளக்கமளித்தார்.
அப்போது உரையாற்றிய ஸ்டாலின், “ஒன்றிய அரசின் கலாசாரத்துறையின்கீழ் இயங்கிக் கொண்டிருக்கும் கலாஷேத்ரா அறக்கட்டளையின் விவகாரத்தைப் பொறுத்தவரைக்கும் தேசிய மகளிர் ஆணையம் முதலில் தாமாக முன்வந்து பாலியல் தொல்லை என ட்விட்டர் செய்தி போட்டு, மார்ச் 21-ம் தேதி, நடவடிக்கை எடுக்கக்கோரி டி.ஜி.பி-க்கு கடிதம் எழுதியது. இது தொடர்பாக கலாசாரத்துறை இயக்குநர் நம் மாநில டி.ஜி.பி-யைச் சந்தித்து தங்களது நிறுவனத்தில் பாலியல் புகார் ஏதும் இல்லை என்று தெரிவித்தார்.
பிறகு தேசிய மகளிர் ஆணையமே `நாங்கள் டைம்ஸ் ஆஃப் இந்தியா செய்தியின் அடிப்படையில் அவ்வாறு விசாரித்தோம். அந்த விசாரணையை முடித்து வைத்துவிட்டோம்’ என மார்ச் 25-ம் தேதியன்று டி.ஜி.பி-க்கு கடிதம் எழுதி தெரிவித்திருக்கிறது. பின்னர் மார்ச் 29-ம் தேதியன்று தேசிய மகளிர் ஆணையத்தின் தலைவரே வந்து கலாஷேத்ராவில் இருக்கிற 210 மாணவிகளிடமும் விசாரித்துவிட்டுச் சென்றிருக்கிறார். அப்போது காவல்துறை தங்களுடன் வரத்தேவையில்லை என்றும் கூறியிருக்கிறார்.
இந்த விவகாரத்தில் காவல்துறைக்கு இதுவரை எழுத்துபூர்வமாகப் புகார் எதுவும் கிடைக்கப்பெறவில்லை. இந்த நிலையில், மாணவிகள் நடத்திய உள்ளிருப்புப் போராட்டத்தின் விளைவாக கலாஷேத்ரா அறக்கட்டளையிலுள்ள கல்லூரிக்கு விடுமுறை அளிக்கப்பட்டு, விடுதிகளைவிட்டு மாணவிகள் வெளியேற வேண்டும் என்று உத்தரவிட்டிருக்கிறார்கள். இந்த விவகாரம் தொடர்பாக மாவட்ட ஆட்சியரிடம் தொடர்பு கொண்டு விவரங்களை அறிந்தேன். இதில் மேலும் விவரங்களை அறிவதற்காக வருவாய் கோட்ட அலுவலர், வட்டாட்சியர், காவல் இணைய ஆணையர், துணை ஆணையர், மற்ற அலுவலர்கள் அங்கு அனுப்பிவைக்கப்பட்டு, அங்கு விசாரணை மேற்கொண்டார்கள்.
இன்று காலையில் மீண்டும் வருவாய்த்துறை, காவல்துறை உயர் அலுவலர்கள் அடங்கிய குழுவினர் அங்கு சென்று மாணவிகள் மற்றும் நிர்வாகத்தினரோடு பேசி வருகிறார்கள். மேலும் அங்குள்ள மாணவர்களின் பாதுகாப்புக்குத் தேவையான அனைத்து நடவடிக்கைகளும் எடுக்கப்பட்டு, பெண் ஆய்வாளர் தலைமையில் காவலர்கள் பாதுகாப்புக்கு நிறுத்தப்பட்டிருக்கிறார்கள். அரசைப் பொறுத்தவரையில் இந்த விவகாரத்தில் உரிய விசாரணை மேற்கொள்ளப்பட்டு, குற்றச்சாட்டு உறுதியானால் தவறு செய்தவர்கள் யாராக இருந்தாலும் அவர்கள்மீது உரிய சட்டரீதியான நடவடிக்கை கட்டாயம் எடுக்கப்படும்” என்று தெரிவித்தார்.