பா.இரஞ்சித்தின் இயக்கத்தில் விக்ரம் நடித்து வரும் ‘தங்கலான்’ படப்பிடிப்பு நிறைவு கட்டத்தை நோக்கி முன்னேறிக் கொண்டிருக்கிறது. சென்னையில் ஒரு ஷெட்யூல் படப்பிடிப்பு நேற்று நடந்து முடிந்திருக்கிறது. படம் குறித்த எக்ஸ்க்ளூசிவ் அப்டேட்களை இனி பார்க்கலாம்.
கடந்த சில வாரங்களுக்கு முன்னர் சென்னையில் உள்ள ஈவிபி திரைப்பட நகரில் ‘தங்கலான்’ படப்பிடிப்பின் ஒத்திகை நடந்த போது, விக்ரமுக்கு விலா எலும்பு பகுதியில் காயம் ஏற்பட்டது. அதன்பின் விக்ரம் ஓய்வெடுத்துத் திரும்பும் வரை, படப்பிடிப்பைத் தள்ளி வைத்தனர். இந்நிலையில் விக்ரமுக்குக் காயம் சரியானதும், மீண்டும் படப்பிடிப்பைத் தொடங்கினார்கள்.
இது ‘கே.ஜி.எஃப்’ எவ்வாறு உருவானது என்பது குறித்த கதை என்பதால் சென்னை, மதுரை, ஒகேனக்கல், கோலார் தங்கவயல் உட்படப் பல இடங்களில் படப்பிடிப்பை நடத்தினார்கள். இதனைத் தொடர்ந்து சென்னையில் மீண்டும் படப்பிடிப்பு தொடங்கி, நேற்றுடன் அந்த ஷெட்யூல் முடிந்திருக்கிறது. ‘நட்சத்திரம் நகர்கிறது’ கிஷோர் குமாரின் ஒளிப்பதிவும், ஜி.வி.பிரகாஷின் இசையும் ‘தங்கலா’னைச் செதுக்கி வருகின்றன.
விக்ரம் இந்தப் படத்தில் 30 வயது இளைஞர், வயதான முதியவர் என இரண்டு தோற்றங்களில் வருகிறார் என்கிறார்கள். இரண்டு மாதத்திற்கு முன்னர் கோலார் தங்கவயலில் 50 நாள்களாகப் படப்பிடிப்பு நடந்தது அல்லவா, அதில் விக்ரம், மாளவிகா மோகனன், பார்வதி திருவோத்து, பசுபதி, ஹாலிவுட் நடிகர் டேனியல் கால்டாகிரோன் என ஒட்டுமொத்த நடிகர்களின் காம்பினேஷனில் படமாக்கினார்கள். கோலார் தங்க வயலில் படமாக்கியதில் விட்டுப்போன காட்சிகளை இங்கே சென்னையில் அரங்கம் அமைத்து இப்போது படமாக்கியுள்ளனர்.
இதற்காகத் திரைப்பட நகரில் பிரமாண்டமான சுரங்கம் செட் ஒன்றை அமைத்துள்ளனர். கொட்டும் மழையில் சுரத்தில் வேலை செய்வதைப் போலப் படமாக்கியுள்ளனர். விக்ரம், மாளவிகா, டேனியல் என அத்தனை நடிகர்களும் இந்தக் காட்சிகளில் இருந்திருக்கிறார்கள் என்கிறார்கள். கடந்த ஐந்து நாள்களாக நடந்து முடிந்த இந்தப் படப்பிடிப்பைத் தொடர்ந்து படக்குழுவினர் மீண்டும் மதுரை செல்கின்றனர்.
மதுரையில் சுதந்திரத்திற்கு முந்தைய காலகட்டத்தில் உள்ள கிராமம் ஒன்றை அரங்கம் அமைத்து படமாக்கினார்கள். இப்போது அங்கே மீண்டும் பேட்ச் ஒர்க் எடுக்கத் திட்டமிட்டு வருகின்றனர். அடுத்த வாரம், மதுரைக்குக் கிளம்பும் ‘தங்கலான்’ குழு, அங்கே ஒரு வாரம் படப்பிடிப்பு நடத்தத் திட்டமிட்டுள்ளது. அந்த ஷெட்யூலுடன் முழு படப்பிடிப்பும் நிறைவடைகிறது என்கிறார்கள்.