கமல், மணிரத்னம் கூட்டணியின் ‘தக் லைஃப்’ படப்பிடிப்பு விரைவில் தொடங்குகிறது.
மல்டி ஸ்டார் படமாக உருவாகும் இந்தப் படத்தில் சமீபத்தில் மலையாள நடிகர் ஜோஜூ ஜார்ஜ், கௌதம் கார்த்திக் ஆகியோர் இணைந்திருக்கிறார்கள். தவிர, த்ரிஷா, ஜெயம் ரவி, துல்கர் சல்மான் எனப் பலரும் நடிக்க உள்ளனர். இந்நிலையில் ‘தக் லைஃப்’ குறித்த தகவல்கள் இனி…
லோகேஷின் ‘விக்ரம்’ படத்திற்குப் பிறகு நடிகர் கமல் ஹாசன், இயக்குநர்கள் அ.வினோத், மணிரத்னம் ஆகியோரின் படங்களில் நடிப்பதாகத் தகவல்கள் வெளியாகின. படங்கள் குறித்த முன்னோட்ட வீடியோக்களும் வெளிவந்தன. இந்நிலையில் கமலின் பிறந்த நாள் ஸ்பெஷலாக மணிரத்னத்தின் பட அறிவிப்பு வெளியானது. கமலின் 234 வது படமாக உருவாகும் ‘தக் லைஃப்’ மல்டி ஸ்டார் படமாக உருவாகிறது. படத்தில் த்ரிஷா, துல்கர் சல்மான், ஜெயம்ரவி எனப் பலரும் அறிவிக்கப்பட்டனர். கடந்த டிசம்பரிலேயே படப்பிடிப்பு தொடங்கும் என எதிர்பார்க்கப்பட்டது. ஆனால், பிக் பாஸ் படப்பிடிப்பு இருந்து வந்ததால் கமல், புதிதாக இந்தப் படத்தை தொடங்காமல், பிராபாஸுடன் நடித்து வரும் ‘கல்கி 2898 AD’ மற்றும் ஷங்கரின் ‘இந்தியன்2’, ‘இந்தியன்3’யில் கவனம் செலுத்தி வந்தார். இந்நிலையில் ‘இந்தியன் 2’ படப்பிடிப்பும் ‘கல்கி 2898’யின் முதல் பாகத்தின் படப்பிடிப்பும் நிறைவடைந்ததால், பிக் பாஸ் படப்பிடிப்பு மற்றும் கட்சி வேலைகளை கவனித்து வந்தார்.
இப்போது பிக் பாஸ் நிறைவடைவதால் மணிரத்னம் படத்தின் படப்பிடிப்புக்கு வருகிறார். ‘தக் லைஃப்’ படத்தின் முன்னோட்ட வீடியோவில் கமல், தன்னை, ‘ரங்கராய சக்திவேல் நாயக்கர்’ என்று இன்ட்ரோ கொடுப்பதுடன், ‘காலன் என்னைத் தேடி வந்தது இது முதல் முறையல்ல, கடைசி முறையும் அல்ல’ என்ற அதிரடி பன்ச் டயலாக்கையும் பேசினார். இது ‘நாயகன்’ படத்தின் தொடர்ச்சி என்றும், ‘பீரியட் ஃபிலிம்’ அல்ல என்றும் சொல்லப்பட்டது. ஆனால், இரண்டையுமே இப்போது மறுத்து வருகின்றனர். இந்த படத்தில் மணியின் ஆஸ்தான தொழில்நுட்பக் கலைஞர்கள் இணைகின்றனர்.
ஏ.ஆர்.ரஹ்மான், ரவி.கே.சந்திரன், ஶ்ரீகர் பிரசாத், ஏகா லகானி என வலுவான டீம் அமைத்துள்ளது. இப்போது மலையாளத்தில் இருந்து ஜோஜூ ஜார்ஜ் இணைந்ததை போல, விரைவில் தெலுங்கில் இருந்தும் ஒரு ஸ்டார் இணைகிறார். படப்பிடிப்பை இம்மாதம் கடைசி வாரத்திலோ அல்லது வரும் பிப்ரவரி முதல் வாரத்திலோ நடத்த திட்டமிட்டுள்ளனர். ஏப்ரல் மாதத்தில் தேர்தல் வருவதால், அதற்கு முன்னதாகவே படப்பிடிப்பை முடித்துக் கொடுக்கவும் விரும்புகிறார்கள்.