25 நாட்களைக் கடந்த 'அயலான், கேப்டன் மில்லர்'
2024ம் ஆண்டு பொங்கலுக்கு தனுஷ் நடித்த 'கேப்டன் மில்லர்', சிவகார்த்திகேயன் நடித்த 'அயலான்', விஜய் சேதுபதி நடித்த 'மெர்ரி கிறிஸ்துமஸ்', அருண் விஜய் நடித்த 'மிஷன் சாப்டர் 1' ஆகிய படங்கள் வெளிவந்தன.
இவற்றில் 'அயலான், கேப்டன் மில்லர்' ஆகிய படங்கள் நேற்றுடன் 25 நாட்களைக் கடந்துள்ளன. இரண்டு படங்களும் இன்னமும் தியேட்டர்களில் ஓடிக் கொண்டிருக்கின்றன. சென்னை மாநகரத்தை எடுத்துக் கொண்டால் 'அயலான்' படம் 23 தியேட்டர்களிலும், 'கேப்டன் மில்லர்' படம் 3 தியேட்டர்களில் மட்டுமே ஓடிக் கொண்டிருக்கிறது. மற்ற மாநகரங்களிலும் 'அயலான்' படத்திற்குத்தான் கூடுதல் தியேட்டர்களில் ஓடிக் கொண்டிருக்கிறது.
இரண்டு படங்களுமே 75 கோடிக்கும் அதிகமான வசூலைக் கொடுத்திருந்தாலும் லாபத்தைத் தரவில்லை என்ற வருத்தத்தில் வினியோகஸ்தர்களும், தியேட்டர்காரர்களும் இருக்கிறார்கள்.
சிவகார்த்திகேயனின் அடுத்த வெளியீடாக அவரது 21வது படமும், தனுஷின் அடுத்த வெளியீடாக அவரே இயக்கி நடிக்கும் அவரது 50வது படமும் அடுத்த சில மாதங்களில் வெளியாகலாம்.