வெலிங்டன்,
நியூசிலாந்து கிரிக்கெட் அணி ஜிம்பாப்வேயில் சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாட உள்ளது. அதன்படி இவ்விரு அணிகள் இடையிலான முதல் டெஸ்ட் போட்டி நாளை தொடங்க உள்ளது. இதனையடுத்து 2-வது மற்றும் கடைசி டெஸ்ட் ஆகஸ்ட் 7-ம் தேதி தொடங்க உள்ளது. 2 போட்டிகளும் புலவாயோவில் நடைபெற உள்ளன.
இந்நிலையில் ஜிம்பாப்வேவுக்கு எதிரான முதல் டெஸ்ட் போட்டியிலிருந்து நியூசிலாந்து அணியின் கேப்டன் டால் லாதம் விலகியுள்ளார். இந்த மாத தொடக்கத்தில் ஏற்பட்ட தோள்பட்டை காயத்திலிருந்து இன்னும் முழுமையாக குணமடையாததால் அவர் இந்த போட்டியிலிருந்து விலகியுள்ளார். இருப்பினும் 2-வது போட்டிக்குள் அவர் முழு உடற்தகுதியை எட்டி விடுவார் என்று எதிர்பார்க்கப்படுகிறது.
இதனையடுத்து முதல் போட்டிக்கான நியூசிலாந்து டெஸ்ட் அணியின் புதிய கேப்டனாக மிச்சேல் சாண்ட்னர் நியமிக்கப்பட்டுள்ளார். நியூசிலாந்து டி20 மற்றும் ஒருநாள் போட்டிகளுக்கான அணியின் கேப்டனாக சாண்ட்னர் உள்ளார் என்பது குறிப்பிடத்தக்கது.