துபாய்,
17-வது ஆசிய கோப்பை கிரிக்கெட் போட்டி (20 ஓவர்) துபாய் மற்றும் அபுதாபியில் நடந்து வருகிறது. இதில் பங்கேற்றுள்ள 8 அணிகள் இரு பிரிவாக பிரிக்கப்பட்டுள்ளன. ‘ஏ’ பிரிவில் நடப்பு சாம்பியன் இந்தியா, பாகிஸ்தான், ஓமன், ஐக்கிய அரபு அமீரகம் அணிகளும், ‘பி’ பிரிவில் ஆப்கானிஸ்தான், இலங்கை, வங்காளதேசம், ஹாங்காங் அணிகளும் இடம் பெற்றுள்ளன.
ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் சுற்று முடிவில் இரு பிரிவிலும் முதல் இரு இடங்களை பிடிக்கும் அணிகள் சூப்பர்4 சுற்றுக்கு தகுதி பெறும். நேற்று முன்தினம் தொடங்கிய இந்த தொடரில் இதுவரை 2 லீக் ஆட்டங்கள் நிறைவடைந்துள்ளன.
இந்நிலையில் ஆசிய கோப்பை போட்டிக்கான டிக்கெட்டுகள் விலை குறித்து தகவல் வெளியாகி உள்ளது. இந்த தொடருக்கான டிக்கெட்டுகள் ‘பிளாட்டினம்லிஸ்ட்.நெட்’ (platinumlist.net) என்ற இணையதளம் மூலம் விற்கப்படுகிறது. லீக் ஆட்டத்திற்கான டிக்கெட்டுகள் ரூ.1,200 முதல் 3,600 வரையிலும், சூப்பர்4 சுற்றுக்கான டிக்கெட்டுகள் ரூ.2,400 முதல் ரூ.6,000 வரையிலும் விற்பனையாகிறது.
இறுதிப்போட்டிக்கான டிக்கெட்டின் விலை குறைந்தபட்சம் ரூ.3,600 ஆகவும், அதிகபட்சம் ரூ.9,600 ஆகவும் நிர்ணயிக்கப்பட்டுள்ளது. சகலவசதிகளுடன் கூடிய சொகுசு டிக்கெட்டுகளின் விலை ரூ.12 ஆயிரத்தில் இருந்து தொடங்குகிறது. இந்தியா- பாகிஸ்தான் உள்பட 7 ஆட்டங்களுக்கான சிறப்பு டிக்கெட் தொகுப்பு ரூ.33,600-க்கு விற்கப்படுகிறது.