கார்த்திக் (சதீஷ்) ஒரு தொலைக்காட்சி தொகுப்பாளர். திருமணத்துக்கு இரண்டு நாட்களே இருக்கும்போது, அவரது அந்தரங்க வீடியோ ஒன்று இணையத்தில் பரவத் தொடங்குகிறது.
இதனால் திருமணமே நின்றுவிடக்கூடிய சூழலில் நண்பன் வாசுவுடன் (சுரேஷ் ரவி) அந்த வீடியோவை நீக்கும் முயற்சியில் இறங்குகிறார் கார்த்திக். இந்த முயற்சி எப்படியெல்லாம் குளறுபடியாகிறது என்பதுதான் ‘முஸ்தபா முஸ்தபா’ கதை.
இது ‘மீக்கு மாத்ரமே செப்தா’ (Meeku Maathrame Cheptha) என்ற தெலுங்குப் படத்தின் ரீமேக்!
படம் முழுக்க சதீஷ், சுரேஷ் ரவி இருவரும் வருகிறார்கள். பாதி வழியில் கருணாகரனும் சேர்ந்துகொள்கிறார். ஆனால், காமெடி மட்டும் டேக் ஆஃப் ஆகாமல் சோதிக்கிறது.
இவர்கள் அல்லாமல் புகழ், லிவிங்ஸ்டன், சாம்ஸ், பாவெல் நவகீதன், சூப்பர்குட் சுப்பிரமணி எனப் பல பரிச்சயமான முகங்கள் வந்து போகிறார்கள். ஆனால், யாருக்குமே அழுத்தமான பாத்திரங்கள் இல்லை.
நாயகிகளாக மோனிகா சின்னகோட்லா, மானசா சௌத்ரிக்கும் பெரிய வேலை இல்லை. கேமியோ பாத்திரத்தில் ஐஸ்வர்யா தத்தா. அவரது கதாபாத்திர வரைவும் மொத்தமாகவே அபத்தமானதாக இருக்கிறது. காமெடி படத்தில் சிரிப்புக்கு நேரெதிர் ரியாக்ஷனே பல காட்சிகளுக்கு வருவது பெரிய மைனஸ்.
ஒரு காமெடி படத்திற்கான மீட்டரில் ஒளிப்பதிவைத் தந்திருக்கிறார் விஷ்ணு ஸ்ரீ. ஜோன்ஸ் ராபர்ட்டின் பாடல்கள் மற்றும் இசையிலும் பெரிய குறை இல்லை. படத்தை 2 மணிநேரத்திற்குள் வைத்த எடிட்டர் தினேஷ் பொன்ராஜின் முடிவு சரியானதே.
நண்பர்கள் கலாட்டா செய்யும் ஜாலியான காமெடி படத்திற்கு இந்த ஒன்லைனே போதுமானது. ஆனால், திசை தெரியாமல் எங்கெங்கோ திரைக்கதையை இழுத்துச் செல்கிறார் இயக்குநர் பிரவீன் சரவணன்.
மிகவும் செயற்கையாக நடந்தேறும் விஷயங்கள் எமோஷனலாகவும் நம்மைத் தொடவில்லை; அடுத்து என்ன என்ற பரபரப்பும் இல்லை. இன்றைய ‘யூத்’களை கவர வேண்டும் என மீம்ஸ், ட்ரெண்டில் இருக்கும் விஷயங்கள் எனப் பலவற்றைச் சேர்த்திருக்கிறார்கள்.
எதுவுமே பெரிதாக ஒர்க் அவுட் ஆகவில்லை. இந்தக் கதையே 2K கிட்ஸ் பெண்களிடம் சுரேஷ் ரவி சொல்லும் கதையாகவே விரிகிறது. இப்படி ட்ரெண்டில் இருக்க முயற்சி செய்யும் அவுட்டேட்டட் படமாகவே ஏமாற்றம் தருகிறது இந்த நண்பர்கள் கீதம்!
மொத்தத்தில், நம்மைச் சிரிக்க வைக்கும் இந்த நண்பர்கள் கூட்டணி வெற்றிபெறவில்லை.