நாம் தினமும் முகம் பார்க்கும் கண்ணாடி முழுவதும் நிறமற்றதோ, வெள்ளையானதோ அல்ல; அது மிக மெல்லிய பச்சை நிறம் கொண்டது.
ஒரு சரியான கண்ணாடி ஒளியின் அனைத்து நிறங்களையும் சமமாக எதிரொளிக்க வேண்டும். அப்படியானால் அதன் நிறம் வெள்ளை என்றே சொல்லலாம். ஆனால், நமது வீடுகளில் பயன்படுத்தப்படும் சாதாரண கண்ணாடிகள், சிலிக்கா கண்ணாடியின் பின்புறம் வெள்ளி அல்லது அலுமினிய பூச்சு பூசப்பட்டு உருவாக்கப்படுகின்றன. இந்த சிலிக்கா கண்ணாடியைத் தயாரிக்கப் பயன்படுத்தப்படும் மூலப்பொருட்களில் இயற்கையாகவே இரும்பு அசுத்தங்கள் கலந்திருக்கும்.
வெளிச்சம் இந்தக் கண்ணாடியின் வழியே சென்று, பின்புறம் உள்ள பூச்சில் பட்டுத் திரும்பும்போது, அதில் உள்ள இரும்பு அணுக்கள் மற்ற நிறங்களை விட பச்சை நிற ஒளியை சற்று அதிகமாக எதிரொளிக்கின்றன. இதனால்தான் கண்ணாடிக்கு அந்த மிக மெல்லிய பச்சை நிறம் கிடைக்கிறது.
இதை எப்படி உணர்வது?
இந்த மெல்லிய பச்சை நிறத்தை நாம் முகம் பார்க்கும்போது சாதாரணமாகக் கண்டறிய முடியாது. ஆனால், இரண்டு கண்ணாடிகளை ஒன்றுக்கொன்று எதிரெதிராக நேராக வைத்தால், முடிவற்ற எதிரொளிப்புகள் தோன்றும். ஒவ்வொரு முறை ஒளி எதிரொளிக்கப்படும் போதும் கொஞ்சம் கொஞ்சமாக மற்ற நிறங்கள் உறிஞ்சப்பட்டு, பச்சை நிறம் மட்டும் தொடர்ந்து தங்கிவிடும்.
விண்வெளி ஆய்விலும், சக்திவாய்ந்த தொலைநோக்கிகளிலும் துல்லியமான பிம்பங்கள் தேவை. எனவே, அங்கே இந்த பச்சை நிறத்தைத் தவிர்க்க இரும்புச்சத்து குறைக்கப்பட்ட சிறப்பு கண்ணாடிகள் அல்லது பூச்சு முன்புறம் அமைந்த `First-surface mirrors’ பயன்படுத்தப்படுகின்றன.
உங்களுக்கு இதுபோல் தெரிந்துகொள்ள வேண்டிய சந்தேகங்கள் இருந்தால் கமென்ட்டில் சொல்லவும். நாம் சேர்ந்து தெரிந்துகொள்வோம்!