மணிப்பூர் ஆளுநராக உள்ள இல.கணேசன், மேற்கு வங்க ஆளுநராகவும் கூடுதல் பொறுப்பு வகித்து வருகிறார். இவரது மூத்த சகோதரரின் 80 ஆவது பிறந்த நாள் விழா சென்னையில் இந்த வாரம் வெகுவிமரிசையாக கொண்டாடப்பட உள்ளது. இந்த விழாவில் பங்கேற்க சென்னை வருமாறு மேற்கு வங்க மாநில முதல்வர் மம்தா பானர்ஜிக்கு, இல.கணேசன அழைப்பு விடுத்திருந்தார்.
அவரது அழைப்பை ஏற்று நாளை மறுநாள் சென்னைக்கு வருகை தரும் மம்தா பானர்ஜி, தமிழக முதல்வர் மு.க.ஸ்டாலினை நேரில் சந்தித்து பேச உள்ளதாக தகவல் வெளியாகி உள்ளது.
இதுதொடர்பாக தமிழக அரசு வெளியிட்டுள்ள செய்திக்குறிப்பில், ‘ தமிழக முதல்வர் மு.க.ஸ்டாலினை, அவரது முகாம் அலுவலகத்தில் புதன்கிழமை (நவம்பர் 2) அன்று மாலை, தமிழ்நாட்டிற்கு வருகை புரியும் மேற்குவங்க மாநில முதலமைச்சர் மம்தா பானர்ஜி நேரில் சந்தித்து பேச உள்ளார்’ என்று தெரிவிக்கப்பட்டுள்ளது.
2024 நாடாளுமன்ற மக்களவைத் தேர்தலுக்கு பாஜக, காங்கிரஸ் உள்ளிட்ட கட்சிகள் தற்போதில் இருந்தே தயாராகி வருகின்றன. தெலங்கானா மாநில முதல்வர் சந்திரசேகர் ராவ், பிகார் மாநில முதல்வர் நிதிஷ் குமார் ஆகியோர் பாஜகவுக்கு எதிராக, தேசிய அளவில் வலுவான மூன்றாவது அணி அமைக்கும் முயற்சிகளை முன்னெடுத்து வருகின்றனர்.
இத்தகைய சூழலில், தமிழக முதல்வர் ஸ்டாலின் உடனான மேற்கு வங்க முதல்வர் மம்தா பானர்ஜியின் சந்திப்பு முக்கியத்துவம் வாய்ந்ததாக கருதப்படுகிறது.