சென்னை:
தமிழகம் முழுவதும் உள்ள பல்கலைக்கழகங்களில் ஏராளமான பேராசிரியர் பணியிடங்கள் நிரப்பப்படாமல் இருப்பது குறித்து அரசுக்கு ஆளுநர் ஆர்.என். ரவி கேள்வியெழுப்பியுள்ளார். மேலும், தமிழகத்தில் உயர்கல்வித்துறையின் செயல்பாட்டுக்கும் அவர் கடும் அதிருப்தியை தெரிவித்துள்ளார்.
தமிழக அரசுக்கும், ஆளுநர் ரவிக்கும் இடையேயான மோதல் போக்கு தற்போது உச்சத்தை அடைந்துள்ளது. செந்தில் பாலாஜி கைது செய்யப்பட்ட பிறகு, அவரை அமைச்சரவையில் இருந்து நீக்குவதாக ஆளுநர் ரவி அதிரடியாக உத்தரவிட்டார்.
இதனிடையே, இந்த நடவடிக்கையில் சட்ட சிக்கல்கள் நிறைய இருந்ததால் அன்றைய தினம் நள்ளிரவே தனது உத்தரவை அவசர அவசரமாக வாபஸ் பெற்றார் ஆளுநர். தனது அதிகார வரம்பு என்னவென்றே தெரியாமல் ஆளுநர் எடுத்த இந்த நடவடிக்கை பெரும் விமர்சனங்களுக்கு உள்ளானது.
இந்த சூழலில், பல்கலைக்கழக சிண்டிகேட் மற்றும் செனட் உறுப்பினர்களுக்கான ஆலோசனைக் கூட்டத்தை ஆளுநர் ரவி இன்று கூட்டினார். பல்கலைக்கழகங்களின் வேந்தர் என்ற முறையில் இந்தக் கூட்டத்தை அவர் கூட்டினார். அப்போது ஆளுநர் ரவி பேசியதாவது:
பல்கலைக்கழங்களின் சிண்டிகேட், செனட் கூட்டங்கள் தலைமைச் செயலகத்தில்தான் நடைபெறுகின்றன. பல்கலைக்கழகங்களில் வெளிப்படைத்தன்மையுடன் கூட்டங்கள் நடைபெறுவதில்லை. இது ஏன் என்று எனக்கு புரியவில்லை. துறைச் செயலாளர்கள் கூட்டங்களில் பங்கேற்காததற்கு துறைச் செயலாளரே காரணம். தமிழகத்தில் உள்ள பல பல்கலைக்கழகங்களில் பேராசிரியர், ஆசிரியர் அல்லாத பணிகளுக்கு அதிக காலியிடங்கள் உள்ளன. இந்த காலியிடங்கள் நீண்டகாலமாக நிரப்பப்படாமல் இருப்பது ஏன்?
இந்தப் பணியிடங்கள் அனைத்தையும் நேர்மையான முறையில் நிரப்ப வேண்டும். துணைவேந்தர்கள் இந்தப் பணியை செய்ய வேண்டும். அதேபோல, பெரும்பாலான பல்கலைக்கழங்கள் பதிவாளர்கள் மற்றும் தேர்வு கட்டுப்பாடு அலுவலர்கள் கூட இல்லாமல் இயங்கி வருகின்றன. இந்தப் பணியிடங்கள் அனைத்தையும் யுஜிசி விதிமுறைகளுக்கு உட்பட்டு பல்கலைக்கழக துணைவேந்தர்கள் நியமனம் செய்ய வேண்டும். தேர்வு கமிட்டியை விரைவில் அமைப்பதற்கான அறிக்கையை மாநில அரசின் கவனத்திற்கு கொண்டு செல்ல வேண்டும். தமிழகத்தில் உயர்கல்வித்துறையின் செயல்பாடு மிகுந்த அதிருப்தியை தருகிறது. இவ்வாறு ஆளுநர் ரவி பேசினார்.