கோயம்புத்தூர், திருப்பூர், ஈரோடு மாவட்டங்களில் மூன்று நாள் சுற்றுப்பயணம் மேற்கொள்ளும் முதலமைச்சர்
பல்வேறு முடிவுற்ற அரசுத் திட்டப் பணிகளை தொடங்கி வைப்பதோடு, பல கோடி ரூபாய் நலத்திட்ட உதவிகளை பயனாளிகளுக்கு வழங்கவுள்ளார். இதற்கான நேற்று மாலை சென்னையில் இருந்து விமானம் மூலம் கோவை வந்தடைந்த முதலமைச்சர் ஸ்டாலினுக்கு திமுகவினர் உற்சாக வரவேற்பு அளித்தனர்.
புதன்கிழமை(24.08.2022) காலை 10 மணிக்கு கோவை ஈச்சனாரியில் நடைபெற்ற அரசு விழாவில் ஒரு லட்சத்து ஏழாயிரம் பேருக்கு நலத்திட்ட உதவிகளை வழங்கினார். மாலை 5 மணிக்கு பெள்ளாச்சி அருகே உள்ள ஆச்சிப்பட்டியில் நடக்கும் கட்சி விழாவில் கலந்துக்கொள்கிறார். அந்த நிகழ்ச்சியில், அமைச்சர் செந்தில் பாலாஜியின் ஏற்பாட்டில் அதிமுக, பாஜக உள்ளிட்ட மாற்றுக்கட்சியினர் ஆயிரக்கணக்கானோர் திமுகவில் இணையவுள்ளனர்.
அதனைத் தொடர்ந்து கார் மூலம் திருப்பூர் செல்லும் முதலமைச்சர் 25-ம் தேதி காலை சிறு,குறு நிறுவனங்களின் சார்பில் நடைபெறும் நிகழ்ச்சியில் கலந்துக்கொள்கிறார்.பின்னர், பிற்பகலில் ஈரோடு மாவட்டம் கோபிக்கு சென்று மாலை 5 மணிக்கு கள்ளிப்பட்டியில் நடக்கும் நிகழ்ச்சியில் கலந்துக்கொள்கிறார்.
அதன் பின்னர் 26-ம் தேதி காலை 10 மணிக்கு பெருந்துறையில் நடக்கும் அரசு நலத்திட்ட உதவிகள் வழங்கும் விழாவில் பயனாளிகளுக்கு நலத்திட்ட உதவிகளை வழங்கும் முதலமைச்சர் கார் மூலம் மாலை கோவை வந்துவிட்டு அங்கிருந்து விமானம் மூலம் சென்னை செல்கிறார். முதலமைச்சர் வருகையையொட்டி கோவை, திருப்பூர், ஈரோடு மாவட்டங்களில் காவல்துறையினர் பலத்த பாதுகாப்பில் ஈடுபட்டுள்ளனர்.
அரசியல் ரீதியாக அதிமுகவின் பலம் வாய்ந்த பகுதியாக உள்ள கொங்கு மண்டலத்தை திமுக தன்வசப்படுத்த பல்வேறு முயற்சிகளை செய்து வருகிறது. கொங்கு மண்டலத்தில் சிறு, குறு நிறுவனங்கள், நெசவாளர்கள், பனியன் தொழிற்சாலை நிறுவனங்களின் பிரச்சனைகளுக்கு தீர்வு காண முயன்று வருவதோடு, பல கோடி ரூபாய் செலவில் திட்டங்களையும் தீட்டி வருகிறது.
இதனால், அதிமுக மற்றும் பாஜக தங்களது பங்கிற்கு ஆளுங்கட்சியின் குறைகள், மின் கட்டண உயர்வு, சொத்துவரி உயர்வு உள்ளிட்டவற்றை வைத்து அரசியல் செய்து வருகின்றனர். அப்படி இருந்தும், கோவை மாவட்டத்தின் பொறுப்பு அமைச்சராக இருக்கும் செந்தில் பாலாஜி பல்வேறு வியூகங்கள் மூலம் திமுகவை பலப்படுத்தும் பணியை தீவிரப்படுத்தியுள்ளார். அதிமுகவில் இருந்தபோது நண்பர்களாக இருந்த சிலரும் அவருக்கு உதவியாக இருப்பதாகவும் சொல்லப்படுகிறது.
இந்த நிலையில், பிரதமர் நரேந்திர மோடி தமிழகம் வரும்போதெல்லாம் திமுக மற்றும் பாஜக எதிர்ப்பாளர்கள் டிவிட்டரில் #GoBackModi என்ற ஹேஸ்டேக்கை டிரெண்ட் செய்து மகிழ்ச்சி அடைவார்கள். திமுகவின் அதே பாணியை பின்பற்றியுள்ள பாஜக தற்போது கொங்கு மண்டலத்தில் சுற்றுப்பயணம் மேற்கொள்ளும் முதலமைச்சர் ஸ்டாலினுக்கு எதிராக #GoBackStalin என்ற ஹேஸ்டேக்கை டிரெண்ட் செய்துள்ளது. இந்த ஹேஸ்டேக் இந்திய அளவில் இரண்டாவது இடத்தில் உள்ளது.