தெலங்கானா மாநிலம் அடிலாபாத் மாவட்டத்தில் வித்யார்த்தி ஜூனியர் கல்லூரி இயங்கி வருகிறது. இந்த கல்லூரியில் தெலங்கானா அரசு தேர்வு வாரியம் நடத்தும் குரூப் 1 தேர்வுக்கு தேர்வு மையம் அமைக்கப்பட்டு இருந்தது.
இந்த மையத்தில், நூற்றுக்கணக்கான தேர்வர்கள் நேற்று காலை தேர்வு எழுத வந்தனர். அப்போது, தேர்வறைக்கு வெளியே இருந்த போலீஸ் அதிகாரிகள், அங்கு வந்த பெண்களிடம் அவர்கள் அணிந்திருந்த நெக்லஸ்கள், வளையல்கள் ஆகியவற்றை கழட்டி வைத்துவிட்டு தேர்வறைக்கு உள்ளே செல்லுமாறு அறிவுறுத்தினர்.
அதன்படி, தேர்வுக்கு வந்த பெண்கள் அனைத்தையும் கழட்டி வைத்து விட்டு, தாலியை மட்டும் கழட்டாமல் இருந்தனர். ஆனால், தாலியையும் கழட்டி வைத்தால் தான் தேர்வு எழுத அனுமதி வழங்கப்படும் என்று அதிகாரிகள் கறாராக தெரிவித்தனர்.
இதனால் கடும் அதிர்ச்சி அடைந்த பெண்கள் வேறு வழி இல்லாமல் தங்களுடைய தாலிகளை கழட்டி உறவினர்களிடம் ஒப்படைத்து விட்டு சோகத்துடன் தேர்வு எழுத சென்றனர்.
இந்த சம்பவம் தெலங்கானா மாநிலத்தில் பெரும் பரபரப்பை ஏற்படுத்தி இருக்கும் நிலையில் போலீஸ் அதிகாரிகளின் இந்த நடவடிக்கைக்கு கடும் எதிர்ப்பு கிளம்பி உள்ளது.
இதுகுறித்து அடிலாபாத் எஸ்.பி உதய்குமார் ரெட்டி கூறுகையில், ‘தேர்வு எழுத வந்த பெண்களிடம் தாலியை கழட்டுமாறு போலீசார் கூறியது உண்மை தான். இதில் ஏதோ தவறு நடந்து இருக்கிறது.
போலீசார் சரியான புரிதல் இல்லாமல் இவ்வாறு செய்து இருக்கின்றனர். எனவே இதுகுறித்து தீவிரமாக விசாரணை நடத்தப்பட்டு வருகிறது. விசாரணைக்கு பிறகு கடும் நடவடிக்கை எடுக்கப்படும்’ என அடிலாபாத் எஸ்.பி உதய்குமார் ரெட்டி கூறினார்.
இதற்கிடையே பெண்களின் தாலியை கழற்ற சொன்ன சம்பவத்துக்கு பாஜக கடும் எதிர்ப்பை பதிவு செய்துள்ளது. இதுகுறித்து தெலங்கானா பாஜக மூத்த தலைவர் பிரீத்தி காந்தி கூறுகையில், ‘சிறுபான்மை மக்களை திருப்திப்படுத்தும் அரசியலில் டிஆர்எஸ் கட்சி ஈடுபட்டு வருகிறது என்பதற்கு இது தான் சிறந்த சான்று.
உடலையே மூடிக்கொள்ளும் புர்கா உடையை அனுமதிப்பார்கள். ஆனால் கழுத்தில் மெல்லியதாக உள்ள தாலியை அனுமதிக்க மாட்டார்கள். இது என்ன மாதிரியான அரசியல்? இந்து பெண்களை இழிவுப்படுத்தியதற்காக முதல்வர் சந்திரசேகர ராவ் மன்னிப்பு கேட்க வேண்டும்’ என்று பிரீத்தி காந்தி சற்று காட்டமாகவே கூறியுள்ளார்.