முதன்முறையாக காக்கி யூனிபார்ம் அணியும் விஜய் தேவரகொண்டா
விஜய் தேவரகொண்டா நடிப்பில் வெளியான அர்ஜுன் ரெட்டி, கீதா கோவிந்தம் என இரண்டு படங்களும் அவரை முன்னணி இளம் நட்சத்திரமாக உயர்த்தின. அதேசமயம் அதைத்தொடர்ந்து அவர் நடித்த படங்கள் அவருக்கு பெரிய அளவில் வெற்றிகளை தரவில்லை. குறிப்பாக சில மாதங்களுக்கு முன்பு வெளியான லைகர் திரைப்படம் மிகப்பெரிய தோல்வியை சந்தித்தது. இந்த நிலையில் குஷி என்கிற படத்தில் நடித்து வருகிறார் விஜய் தேவரகொண்டா. இதைத்தொடர்ந்து தனது அடுத்த படத்தில் முதன்முறையாக போலீஸ் அதிகாரி கதாபாத்திரத்தில் நடிக்க இருக்கிறார் விஜய் தேவரகொண்டா.
இது குறித்த அதிகாரப்பூர்வமான அறிவிப்பு தற்போது வெளியாகி உள்ளது. ஜெர்சி உள்ளிட்ட படங்கள் மூலம் ரசிகர்களின் கவனத்தை ஈர்த்த இயக்குனர் கவுதம் தின்னனூரி இந்த படத்தை இயக்குகிறார். தெலுங்கு சினிமாவின் பிரபல தயாரிப்பு நிறுவனமான சித்தாரா என்டர்டெயின்மென்ட் இந்த படத்தை தயாரிக்கிறது. போலீஸ் யூனிபார்ம் அணிந்த, யாரென்று முகம் தெரியாத ஒரு உருவத்துடன் இதன் பர்ஸ்ட்லுக் போஸ்டர் தற்போது வெளியாகி உள்ளது.