சென்னைக்கு வரும் 'லைகர்' படக்குழு
பூரி ஜகன்னாத் இயக்கத்தில், விஜய் தேவரகொண்டா, அனன்யா பாண்டே, ரம்யா கிருஷ்ணன் மற்றும் பலர் நடித்துள்ள படம் 'லைகர்'. ஹிந்தி, தெலுங்கில் தயாராகியுள்ள இந்தப் படம் தமிழிலும் டப்பிங் ஆகி, வரும் ஆகஸ்ட் 25ம் தேதி வெளியாக உள்ளது.
விஜய் தேவரகொன்டா நடிக்கும் முதல் நேரடி ஹிந்திப் படம் இது. படத்தில் விஜய் தேவரகொண்டா ஒரு பாக்ஸராக நடித்துள்ளார். இப்படத்தின் பிரமோஷனை இந்தியா முழுவதும் நடத்தத் திட்டமிட்டுள்ளார்கள். அந்த வரிசையில் வரும் ஆகஸ்ட் 13ம் தேதி சென்னையில் உள்ள தனியார் இஞ்சினியரிங் கல்லூரி ஒன்றில் படத்தின் வெளியீட்டிற்கு முந்தைய விழா நடக்க உள்ளது. அதில் படக்குழுவினர் அனைவரும் கலந்து கொள்கிறார்கள்.
இப்படத்தில் பிரபல குத்துச் சண்டை வீரர் மைக் டைசன் நீட்டிக்கப்பட்ட சிறப்புத் தோற்றம் ஒன்றில் நடித்துள்ளார். கன்னடம், மலையாளத்திலும் இப்படம் வெளியாகிறது. விஜய்யின் முதல் பிரம்மாண்டமான பான் இந்தியா படம் என்பதால் படம் மீதான எதிர்பார்ப்பு அதிகமாக உள்ளது. இப்படம் வெற்றி பெற்றால் பாலிவுட்டில் அவரும் ஒரு ஹீரோவாக வலம் வர வாய்ப்புகள் அதிகம்.