ரோஷாக் படக்குழுவினருக்கு பரிசளித்த மம்முட்டி – துல்கர் சல்மான்
கடந்த சில வாரங்களுக்கு முன்பு மலையாளத்தில் மம்முட்டி நடித்த ரோஷாக் என்கிற திரைப்படம் வெளியானது. சைக்காலஜிக்கல் திரில்லர் ஆக உருவாகியிருந்த இந்த படத்தில் தனது கர்ப்பிணி மனைவியின் இறப்புக்கு காரணமானவர்களை வித்தியாசமான முறையில் எப்படி மம்முட்டி பழிவாங்குகிறார் என்பதை மையப்படுத்தி உருவாகி இருந்தது. இந்த படத்தை நிஜாம் பஷீர் என்பவர் இயக்கியிருந்தார். மம்முட்டியே இந்த படத்தை தயாரித்து இருந்தார். அவரது மகன் துல்கர் சல்மான் இந்த படத்தை தனது வே பார் பிலிம்ஸ் நிறுவனம் சார்பாக வெளியிட்டிருந்தார்.
படம் வெளியான சமயத்தில் ரசிகர்களிடம் வரவேற்பையும் அதே சமயம் மாறுபட்ட விமர்சனங்களையும் பெற்றாலும் வசூல் ரீதியாக வெற்றி படமாக அமைந்தது. இந்த நிலையில் இந்த வெற்றியை கொண்டாடும் விதமாக இந்த படத்தில் பணியாற்றிய குழுவினருக்கு பரிசுகளை வழங்கி மகிழ்ச்சியில் ஆழ்த்தியுள்ளனர் மம்முட்டியும் துல்கர் சல்மானும். மேலும் இந்த படத்தில் தனது உருவத்தையே காட்டாமல் முகமூடி அணிந்தபடி கண்களால் நடித்த நடிகர் ஆசிப் அலிக்கும் தங்களது நன்றியை தெரிவித்து பரிசு வழங்கினர்.