மாண்டஸ் புயல் இன்று (டிசம்பர் 10) அதிகாலை 2.30 மணியளவில் கரையைக் கடந்தது. புயல் கரையை கடக்கும் நேரத்தில் 70 முதல் 80 கி.மீட்டர் வேகத்தில் பலத்த காற்று வீசியது. இந்த சமயம் சென்னையை புரட்டி எடுத்துள்ளது. இதன் காரணமாக உயிர் சேதம், பொருள் சேதம் ஏற்பட்டுள்ளது.
சென்னை மடிப்பாக்கம் ராம்நகர் 7ஆவது பிரதான சாலையில் வாகன நிறுத்துமிடத்தில் மின்சாரம் தாக்கி 2 பேர் பலியாகினர். அறுந்து கிடந்த மின்கம்பியை மிதித்த லட்சுமி என்ற பெண்ணும் அவரது அண்ணன் மகன் ராஜேந்திரன் என்பவரும் உயிரிழந்தனர். குடிசை வீட்டில் இருந்த இவர்கள் புயலின் போட்து பாதுகாப்புக்காக மற்றொரு வீட்டு வாகன நிறுத்துமிடத்துக்கு சென்றுள்ளனர். தூங்குவதற்காக பாய் எடுத்துவிட்டு வரும் போது இந்த துயர சம்பவம் நடந்துள்ளது.
காஞ்சிபுரம் மாவட்டம் ஸ்ரீபெரும்புதூர் அருகே பிள்ளைப்பாக்கம் பகுதியில் மின்சாரம் தாக்கி இரண்டு வட மாநில ஊழியர்கள் பலியாகினர். புயலால் அறுந்து விழுந்து கிடந்த மின் கம்பியை தவறுதலாக மிதித்த நிலையில் இருவரும் உயிரிழந்தனர். சிப்காட்டில் உள்ள தனியார் நிறுவனத்தில் வேலையை முடித்துவிட்டு திரும்பும் போது இந்த விபத்து நிகழ்ந்துள்ளது.
சைதாப்பேட்டை நெருப்பு மேடு பகுதியில் குடிசை வீட்டில் பக்கத்து வீடு இடிந்து விழுந்தது. மூன்று பேர் படுகாயமடைந்துள்ளனர். அவர்களுக்கு சிகிச்சை அளிக்கப்பட்டு வருகிறது. குழந்தையும், தாயும் தலையில் பலத்த அடிபட்டு உயிருக்கு போராடிக்கொண்டிருக்கிறார்கள். சைதாப்பேட்டையில் நேரடி கள ஆய்வு மேற்கொண்ட அமைச்சர் மா.சுப்பிரமணியன் இந்த தகவலை பகிர்ந்து கொண்டார்.
தொடர்ந்து பேசிய அவர், “சென்னையில் 16 சுரங்கப்பாதைகளில் நீர் தேங்காமல் சீரானப் போக்குவரத்து நடைபெறுகிறது.
மண்டலத்துக்கு தலா 20 முதல் 30 மரங்கள் விழுந்த நிலையில் சென்னை முழுவதும் 300 முதல் 400 மரங்கள் விழுந்துள்ளன. இந்த மரங்களை அகற்றும் பணிகளை மாநகராட்சி ஊழியர்கள் இரவு முதலே செய்து வருகின்றனர்.
ஜேசிபி, டிப்பர் லாரி உள்ளிட்ட 200 வாகனங்கள், 130 ஜெனரேட்டர்கள் பயன்படுத்தப்படுகின்றன. வார்டுக்கு ஒரு மோட்டார் இயந்திரம் இருக்கும் நிலையில் 911 மோட்டார் இயந்திரங்கள் வாடகைக்கு அமர்த்தப்பட்டுள்ளன.
261 மரம் அறுக்கும் இயந்திரங்கள் மூலம் பணியில் ஈடுபடுத்தப்பட்டுள்ளன. 169 இடங்களில் நிவாரண மையங்கள் செயல்பட்டு வருகின்றன” என்று கூறினார்.