விழுப்புரம்:
திமுக நிர்வாகியை லூசு என அமைச்சர் பொன்முடி திட்டிய வீடியோ சமூக வலைதளங்களில் தீயாக பரவி சலசலப்பை ஏற்படுத்தியுள்ளது.
தமிழக உயர்கல்வித்துறை அமைச்சர் பொன்முடி சர்ச்சைக்கு பெயர் போனவர். அதிலும் சமீபகாலமாக அவரது பேச்சுகள் பெரிய அளவில் சர்ச்சையை ஏற்படுத்தியதுடன் முதல்வர் மு.க. ஸ்டாலினையும் அதிருப்தியில் ஆழ்த்தியது. பெண்களுக்கான இலவச பேருந்து பயணத்தை சுட்டிக்காட்டி ஓசி பயணம் என கிண்டல் அடித்தது; தொகுதியில் உள்ள குறைகளை கூறியவரிடம் “நீ என்ன திமுகவுக்காக ஓட்டு போட்ட..” என திட்டியது என அடுத்தடுத்து சர்ச்சைகளில் சிக்கினார் பொன்முடி.
இதுதொடர்பான வீடியோக்கள் சமூக வலைதளங்களில் வைரலாகி மக்கள் மத்தியில் பெரும் கொதிப்பை ஏற்படுத்தியது. இதனை மனதில் வைத்துதான் முதல்வர் மு.க. ஸ்டாலின், “காலையில் எழும் போதே நம்மவர்கள் என்ன பிரச்சினை செய்திருப்பார்களோ என நினைத்துக் கொண்டுதான் எழுகிறேன். சரியாக தூங்க கூட முடியவில்லை” என வெளிப்படையாக தனது ஆதங்கத்தை கொட்டி தீர்த்தார்.
இதனிடையே, அமலாக்கத்துறை ரெய்டுகளால் மீண்டும் பொன்முடியின் பெயர் டெல்லி வரை அடிபட்டு வருகிறது. இந்த ரெய்டு களோபரங்களுக்கு மத்தியிலும் பல்வேறு அரசு நிகழ்ச்சிகளில் பங்கேற்று வருகிறார் பொன்முடி. அந்த வகையில், விழுப்புரம் மாவட்டம் வானூர் ஊராட்சியில் தூய்மை பணியாளர்களுக்கு பேட்டரி வாகனம் வழங்கும் நிகழச்சியில் அமைச்சர் பொன்முடி கலந்து கொண்டார்.
பேட்டரி வாகனங்களை வழங்கிய பின்னர், பேசுவதற்காக மைக்கை கேட்டார். ஆனால் மைக் வழங்கப்படாமல் இருந்துள்ளது. மேலும், மேடையும் அமைக்கபபடாமல் இருந்திருக்கிறது. இதனால் கோபமடைந்த பொன்முடி, நிகழ்ச்சிக்கு ஏற்பாடு செய்திருந்த திமுக நிர்வாகியை திட்டினார். ஒருகட்டத்தில், “ஏய் லூசு” என வசைபாடினார். இதனால் கூட்டத்தில் சிறிது நேரம் சலசலப்பு ஏற்பட்டது.