பிரிஸ்பேன்,
இந்தியா ஏ மகளிர் கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு விளையாடியது. இதில் முதலில் நடைபெற்ற டி20 தொடரை ஆஸ்திரேலிய ஏ அணியும், 2-வது நடைபெற்ற ஒருநாள் தொடரை இந்திய ஏ அணியும் கைப்பற்றின.
இதனையடுத்து இவ்விரு அணிகள் இடையே ஒரே ஒரு போட்டி கொண்ட டெஸ்ட் (4 நாட்கள்) தொடர் கடந்த 21-ம் தேதி ஆரம்பமானது. இதில் டாஸ் வென்ற ஆஸ்திரேலியா பந்துவீச்சை தேர்வு செய்தது.
அதன்படி முதல் இன்னிங்சில் விளையாடிய இந்திய ஏ அணி 89.1 ஓவர்களில் 299 ரன்களில் ஆல் அவுட் ஆனது. அதிகபட்சமாக ரக்வி பிஸ்ட் 93 ரன்கள் அடித்தார். பின்னர் தனது முதல் இன்னிங்சை தொடங்கிய ஆஸ்திரேலியா ஏ 76.2 ஓவர்களில் 305 ரன்கள் குவித்த நிலையில் ஆல் அவுட் ஆனது. அதிகபட்சமாக சியானா 103 ரன்கள் அடிக்க, இந்தியா தரப்பில் சைமா தாகூர் 3 விக்கெட்டுகள் வீழ்த்தினார்.
இதனையடுத்து 6 ரன்கள் பின்னிலையுடன் 2-வது இன்னிங்சை தொடங்கிய இந்திய அணி 3ம் நாள் முடிவில் 8 விக்கெட்டுகளை இழந்து 260 ரன்கள் அடித்து 254 ரன்கள் முன்னிலை பெற்றிருந்தது. ஜோஷிதா 9 ரன்களுடனும், டைட்டஸ் சது 2 ரன்களுடனும் களத்தில் உள்ளனர். ரக்வி பிஸ்ட் 86 ரன்களிலும், ஷபாலி வர்மா 52 ரன்களிலும் ஆட்டமிழந்தனர்.
இத்தகைய சூழலில் 4-வது மற்றும் கடைசி நாள் ஆட்டம் இன்று நடைபெற்றது. தொடர்ந்து பேட்டிங் செய்த இந்தியா ஏ 2-வது இன்னிங்சில் 286 ரன்களில் ஆல் அவுட் ஆனது. இதன் மூலம் ஆஸ்திரேலிய ஏ அணிக்கு 281 ரன்கள் இலக்காக நிர்ணயிக்கப்பட்டது. ஆஸ்திரேலியா தரப்பில் எமி எட்கார் 5 விக்கெட்டுகள் வீழ்த்தினார்.
பின்னர் 281 ரன்கள் அடித்தால் வெற்றி என்ற இலக்கை நோக்கி களமிறங்கிய ஆஸ்திரேலிய அணிக்கு தொடக்க வீராங்கனைகளான ரேச்சல் ட்ரெனமன் – தஹ்லியா வில்சன் இருவரும் சிறப்பாக விளையாடி வலுவான அடித்தளம் அமைத்து கொடுத்தனர். முதல் விக்கெட்டுக்கு 117 ரன்கள் பார்ட்னர்ஷிப் அமைத்த நிலையில் தஹ்லியா வில்சன் 46 ரன்களில் ஆட்டமிழந்தார். சிறிது நேரத்திலேயே ரேச்சல் 64 ரன்களில் அவுட்டானார்.
அடுத்து வந்த மேடி டார்கி (68 ரன்கள்), அனிகா (72 ரன்கள்) அரைசதம் அடிக்க ஆஸ்திரேலிய ஏ அணி 85.3 ஓவர்களில் 4 விக்கெட்டுகளை மட்டுமே இழந்து 283 ரன்கள் அடித்து 6 விக்கெட் வித்தியாசத்தில் அபார வெற்றி பெற்றது. அத்துடன் இந்தியாவுக்கு எதிரான டெஸ்ட் தொடரையும் கைப்பற்றி அசத்தியது.