சிறந்த சின்னத்திரை கலைஞர்களைக் கெளரவிக்கும் 2024-ம் ஆண்டுக்கான விகடன் சின்னத்திரை விருதுகள் விழா கடந்த அக்டோபர் 12ம் தேதி சென்னையில் நடைபெற்றது.
இதில், 2024-ம் ஆண்டின் `ஃபேவரைட் மாமியார் மருமகள்’ விருதுகள் நிரோஷா, சரண்யா துராடி, ஹேமா, ஹாலினி உள்ளிட்ட ‘பாண்டியன் ஸ்டோர்ஸ் -2’ நட்சத்திரங்களுக்கு வழங்கப்பட்டன. நடிகை பூர்ணிமா பாக்யராஜ் இவ்விருதினை வழங்கி சிறப்பித்தார்.
பூர்ணிமா பாக்யராஜ் பேசுகையில், “பாண்டியன் ஸ்டோர்ஸ் சீரியல் இவ்வளவு நாள்களாக வரவேற்பைப் பெற்று ஓடிக்கொண்டிருக்கிறது. அதோட தரம் எப்படியிருக்கும் என்று நினைச்சுப் பார்க்கிறேன். நிரோஷா சிறந்த மாமியருக்கான விருதைப் பெற்றிருக்கிறார். அவரை நான் சின்ன வயசுல விளையாட்டுப் பொண்ணாகப் பார்த்திருக்கேன். இப்போ பெரிய பொண்ணாகிச் சாதித்துக் கொண்டிருப்பது ரொம்ப மகிழ்ச்சி.
நல்ல திறமையான நடிப்பு மட்டுமல்ல ஜாலியான நகைச்சுவையையும் சேர்த்துப் பெர்ஃபாமன்ஸ் பண்ணுவார். அந்த இரண்டு திறமையும் ஒன்றாக எல்லாருக்கும் இருக்காது. அந்த வகையில் நிரோஷா ஸ்பெஷலான பொண்ணுதான்” என்று பேசினார்.
நிரோஷா பேசுகையில், “‘சின்ன பாப்பா பெரிய பாப்பா’வில் நடித்து ஒரு அடையாளம் எனக்கு இருந்தது. ‘பாண்டியன் ஸ்டோர்ஸ்’ சீரியல் மூலமாக எனக்கு ஒரு நல்ல அடையாளம் கிடைச்சிருக்கு. இந்த சீரியலில் என்னோடு மருமகளாக நடித்த சரண்யா துராடி, ஹேமா, ஹாலினி எல்லோருக்கும் என்னோட நன்றிகள்” என்று நெகிழ்ச்சியாகப் பேசியிருக்கிறார்.
நிரோஷாவின் அம்மா, அவரது கையால் விகடன் விருதைத் தருவதுபோன்ற புகைப்படத்தைப் பரிசாகப் பெற்று கண் கலங்கினார் நிரோஷா. இந்த முழுக் காணொலியை ‘Tele Vikatan’ சேனலில் காணவும்.