கிறிஸ்துமஸ் பண்டிகை உலகம் முழுவதும் நாளை கொண்டாடப்படவுள்ளது. இதையடுத்து, புத்தாண்டை வரவேற்க பொதுமக்கள் தயாராக உள்ளனர். கிறிஸ்துமஸ் புத்தாண்டு பண்டிகைகள் மற்றும் அரையாண்டு தேர்வு விடுமுறை ஆகியவற்றையொட்டி பொதுமக்கள் தங்களது சொந்த ஊர்களுக்கு பயணப்பட்டு வருகிறார்கள். பண்டிகைகளை முன்னிட்டு அரசு சிறப்பு பேருந்துகளை இயக்கி வருகிறது.
அதுதவிர, ஆம்னி பேருந்துகளிலும் பொதுமக்கள் சொந்த ஊர்களுக்கு சென்று வருகின்றனர். வழக்கம்போலவே ஆம்னி பேருந்துகளில் டிக்கெட் கட்டணம் அதிகமாக வசூலிக்கப்படுவதாக புகார்கள் எழுந்துள்ளன. அரசும் எச்சரிப்பது போல் எச்சரிக்கிறது; சில பேருந்துகளுக்கு அபராதம் விதிக்கப்பட்டு கணக்கு காட்டப்படுகிறது; ஆனாலும், பெரும்பாலான பேருந்துகளில் கட்டணம் அதிகமாகவே வசூலிக்கப்படுகிறது. அரசின் எச்சரிக்கைகளை ஆம்னி பேருந்துகள் பொருட்படுத்துவது போன்றே தெரிவதில்லை.
இந்த நிலையில், ஆம்னி பேருந்துகளின் கட்டணத்தை தமிழக அரசே நிர்ணயிக்க வேண்டும் என
வலியுறுத்தியுள்ளார். இதுகுறித்து அவர் தனது ட்விட்டர் பக்கத்தில், “கிறித்துமஸ் மற்றும் புத்தாண்டு காரணமாக தனியார் பேருந்துகளின் கட்டணம் விண்ணை முட்டும் அளவுக்கு அதிகரித்துள்ளது. சென்னை – மதுரைக்கு இன்று பயணிக்க அதிகபட்சமாக ரூ.4999 கட்டணம் வசூலிக்கப்படுகிறது. இந்த கட்டணக் கொள்ளை கடுமையாக கண்டிக்கத்தக்கது.
பண்டிகைகளுக்கு முன்பாக ஆம்னி பேருந்துகள் விருப்பம் போல கட்டணத்தை உயர்த்திக் கொள்வதும், அதை அரசு வேடிக்கை பார்ப்பதும் வாடிக்கையாகி விட்டன. கட்டணக் கொள்ளை குறித்து எவரேனும் புகார் அளித்தால் தான் நடவடிக்கை எடுப்போம் என போக்குவரத்துத் துறை கூறுவது பொறுப்பை தட்டிக்கழிக்கும் செயல்!
ஆம்னி பேருந்துகளின் கட்டணத்தை அரசே நிர்ணயிக்க வேண்டும் என சென்னை உயர் நீதிமன்றம் பல முறை தீர்ப்பளித்திருக்கிறது. அதற்கு மாறாக ஆம்னி பேருந்து சங்கங்களே கட்டணத்தை நிர்ணயித்துக் கொள்ள போக்குவரத்துத் துறை அனுமதிப்பது நீதிமன்ற அவமதிப்பு ஆகும்!
ஆம்னி பேருந்தில் பயணிப்பவர்கள் அனைவரும் பணக்காரர்கள் அல்ல. ஆம்னி பேருந்துகள் அதிக லாபம் ஈட்ட பொதுமக்களை கசக்கிப் பிழிய அனுமதிக்கக் கூடாது. ஆம்னி பேருந்துகளுக்கான கட்டணத்தை அரசே நிர்ணயிக்க வேண்டும். அதற்காக சட்டப்பூர்வ ஆணையத்தை ஏற்படுத்த வேண்டும்.” என
நிறுவனர் ராமதாஸ் வலியுறுத்தியுள்ளார்.