மத்திய பாஜக அரசை கடுமையாக விமர்சித்து வருபவர்களில் தெலங்கானா மாநில முதல்வர் சந்திரசேகர் ராவ் முக்கியமானவராக திகழ்கிறார். 2024 மக்களவைத் தோ்தலில் பாஜகவுக்கு எதிராக தேசிய அளவில் கூட்டணியை உருவாக்குவதற்கான முயற்சியில் இவர் தீவிரமாக ஈடுபட்டு வருகிறாா். அதற்காக பாஜக மற்றும் காங்கிரஸ் அல்லாத எதிா்க்கட்சித் தலைவா்களை சந்தித்து தொடர் ஆலோசனைகளையும் ராவ் மேற்கொண்டு வருகிறார்.
இந்த நிலையில், சந்திரசேகர் ராவ் தேசிய அளவில் புதிய கட்சியை துவங்க உள்ளதாகவும், அக்கட்சியின் பெயரை தசரா பண்டிகையையொட்டி நாளை அறிவிக்கவுள்ளதாகவும் தகவல் வெளியாகியுள்ளது. அக்டோபர் 5 ஆம் தேதி (நாளை) கட்சியின் மூத்த நிர்வாகிகளுடன் கேசிஆர் ஆலோசனை மேற்கொள்ளவுள்ளதாக அறிவிப்பு வெளியாகியுள்ளது. இந்த கூட்டத்துக்கு பின்னர் தேசிய அரசியலில் நுழைவது தொடர்பான முக்கிய அறிவிப்பு வெளியாகலாம் எனவும், அதனைத்தொடர்ந்து கட்சியின் பிரதிநிதிகள் குழு டெல்லி சென்று கட்சியின் பெயரை மாற்றுவதற்கான வேலைகளில் ஈடுபடுவர் எனவும் கூறப்படுகிறது.
அப்படி பெயரை மாற்றும்பட்சத்தில், அக்கட்சிக்கு ‘பாரத் ராஷ்டிர சமிதி’ என்ற பெயர் வைக்கப்பட வாய்ப்புள்ளதாகவும், முன்னதாக, கட்சியின் பொதுக்குழு கூட்டப்பட்டு அதற்கான முடிவு எடுக்கப்படும் எனவும் அக்கட்சி வட்டாரங்களில் தகவல் வெளியாகி உள்ளது.
இதனிடையே, வாராங்கல்லை சேர்ந்த தெலங்கானா ராட்டிரிய சமிதி (டிஆர்எஸ்) கட்சியை சேர்ந்த நிர்வாகியான ராஜநல்லா ஸ்ரீஹரி, கேசிஆர் தேசிய கட்சி துவங்கவுள்ளதை வித்தியாசமான முறையில் கொண்டாடி உள்ளார். தமது தலைவரான சந்திரசேகர் ராவ், தேசிய கட்சி துவங்கவுள்ளதாக வெளியாகி உள்ள தகவலால் மகிழ்ச்சியடைந்த ராஜநல்லா ஸ்ரீஹரி,, அதனை பொதுமக்களுக்கு குவாட்டரும், உயுிருள்ள பிராய்லர் கோழியும் கொடுத்து கொண்டாடி உள்ளார்.
பொதுவெளியில் மக்களை வரிசையாக நிற்க வைத்து அவர் குவாட்டர் வழங்கும் வீடியோ தற்போது வைரலாகி வருகிறது. தமிழகத்தில் சில அரசியல் கட்சிகள் ,தாங்கள் நடத்தும் பொதுக்கூட்டங்களுக்கு மக்களை காசு கொடுத்து அழைத்து வருவதுடன், அவர்களுக்கு குவாட்டரும், பிரியாணியும் அளிப்பதாகவும் குற்றச்சாட்டு இருந்து வருகிறது. இந்த நிலையில் டிஆர்எஸ் நிர்வாகி ஒருவர் பொதுமக்களுக்கு இப்படி ஓப்பனாக குவாட்டரும், கோழியும் தந்துள்ள சம்பவம் அரசியல் அரங்கில் பேரதிர்ச்சியை ஏற்படுத்தி உள்ளது.