ரெட் அலர்ட் டூ மஞ்சள் அலர்ட்… தமிழகத்தில் அதீத கனமழை… புரட்டி எடுக்கும் மாண்டஸ் புயல்!

சென்னைக்கு 270 கிலோமீட்டர் தெற்கு – தென்கிழக்கில் மாண்டஸ் புயல் மையம் கொண்டுள்ளது. மணிக்கு 13 கிலோமீட்டர் வேகத்தில் நகர்ந்து வருகிறது. அடுத்த 3 மணி நேரத்தில் புயலின் தீவிரம் குறையும். இதையடுத்து வடமேற்கு மற்றும் வட தமிழகம், தெற்கு ஆந்திர கடலோரப் பகுதிகளை ஒட்டி புதுச்சேரி மற்றும் ஸ்ரீஹரிகோட்டாவிற்கு இடையில் இன்று நள்ளிரவு புயல் கரையை கடக்கவுள்ளது.

அப்போது 65 முதல் 75 கிலோமீட்டர் வேகத்தில் காற்று வீசக்கூடும். அதிகபட்சமாக 85 கிலோமீட்டர் வேகம் வரை காற்று வீசலாம். இதனால் தமிழகத்தின் பல்வேறு மாவட்டங்களில் கனமழை முதல் அதீத கனமழை வரை பெய்யும் என்று சென்னை வானிலை ஆய்வு மையம் தெரிவித்துள்ளது.

ரெட் அலர்ட் (09-12-2022)

* காஞ்சிபுரம், செங்கல்பட்டு, விழுப்புரம் (மிகக் கனமழை முதல் அதீத கனமழை வரை பெய்யக்கூடும்)

ஆரஞ்சு அலர்ட் (09-12-2022)

* சென்னை, திருவள்ளூர், ராணிப்பேட்டை, வேலூர், திருப்பத்தூர், திருவண்ணாமலை, கள்ளக்குறிச்சி, கடலூர் (கனமழை முதல் மிகக் கனமழை பெய்யக்கூடும்)

மஞ்சள் அலர்ட் (09-12-2022)

* தருமபுரி, சேலம், நாமக்கல், கரூர், திருச்சி, பெரம்பலூர், அரியலூர், மயிலாடுதுறை, காரைக்கால், நாகப்பட்டினம், திருவாரூர், தஞ்சாவூர், புதுக்கோட்டை, சிவகங்கை, மதுரை, திண்டுக்கல் மற்றும் காரைக்கால் (கனமழை பெய்யும்)

ஆரஞ்சு அலர்ட் (10-12-2022)

* கிருஷ்ணகிரி, தருமபுரி, திருப்பத்தூர், வேலூர், ராணிப்பேட்டை, திருவண்ணாமலை, செங்கல்பட்டு, காஞ்சிபுரம், சென்னை, திருவள்ளூர்

மஞ்சள் அலர்ட் (10-12-2022)

நீலகிரி, ஈரோடு, சேலம், கள்ளக்குறிச்சி, விழுப்புரம் மற்றும் புதுச்சேரி

தென்மேற்கு வங்கக்கடலில் காற்றின் வேகம்

மணிக்கு 85 முதல் 95 கிலோமீட்டர் வரை காற்று வீசும். அதிகபட்சமாக 105 கிலோமீட்டர் வரை வீசக்கூடும். இது அடுத்த 6 மணி நேரத்தில் 80-90 கிலோமீட்டர் (அதிகபட்சம் 100 கி.மீ) என குறையும். இன்று மாலை 70-80 கிலோமீட்டர் (90 கி.மீ) என மேலும் குறையும். நாளை காலை 60-70 (அதிகபட்சம் 80 கி.மீ) எனவும், நாளை மாலை 25-35 (அதிகபட்சம் 45 கி.மீ) எனவும் படிப்படியாக குறையும்.

தமிழகம், புதுச்சேரி, தெற்கு ஆந்திரா மற்றும் வடக்கு இலங்கை கடலோரப் பகுதிகள்

மணிக்கு 45-55 கிலோமீட்டர் (அதிகபட்சம் 65 கி.மீ) வேகத்தில் பலத்த காற்று வீசும். இது படிப்படியாக அதிகரித்து அடுத்த 6 மணி நேரத்தில் 50-60 கி.மீ (அதிகபட்சம் 70 கி.மீ) வேகத்தில் வீசக்கூடும். பின்னர் படிப்படியாக குறைந்து 25-35 கி.மீ வேகத்தை அடையும்.

மன்னார் வளைகுடா

இன்று மணிக்கு 40-50 கி.மீ (அதிகபட்சம் 60 கி.மீ) வேகத்தில் காற்று வீசும்.